"Qarabağ" Misli premyer-liqasının 22-ci turunda "Sabah"la heç-heçə etdi - 3:3.

"Football-plus.az" xəbər verir ki, Ağdam təmsilçisinin baş məşqçisi Qurban Qurbanov oyunsonrası mətbuat konfransında jurnalistlərin suallarını cavablandırdı.

- Bu gün çox maraqlı oyun alındı. Stadionda gözəl atmosfer var idi. Hər iki komandanın azarkeşlərinə təşəkkür edirəm. Azarkeşlərin görmək istədiyi kimi matç oldu. Rəqibin hücum xətti çox güclüdü. Futbol elə səviyyəyə çatıb ki, belə hesab hər oyunda baş verə bilər. Futbolun sevilən tərəfi ondadı ki, bəzən düşünmədiyin hallar ilə üzləşirsən. Məni narahat edən futbolçularımın bərpasıdı. Çox gərgin qrafikdə oynayırdıq. “Nyukasl”dan sonra belə bir matç oldu. Üç gün sonra kubok, sonra yenidən çempionat oyunu olacaq.

- Hakimin oyunun əsas vaxtına 6 dəqiqə əlavə etməsi sizcə az deyildimi?
- Belə matçda, bu qədər oyunun dayandığı oyunda 6 dəqiqənin əlavə edilməsi məncə də az idi.

- Matç başa çatandan sonra rəqib komandadakı həmkarınızla 1-2 dəqiqəlik səhbətiniz oldu. Sirr deyilsə, nə danışırdız?
- Rəqibin köməkçi məşqçisi bizə qarşı ədəbsizlik etdi. Danışığımız da bu yöndə idi. Bildirdim ki, bizim bütün heyətdən buna görə üzr istəmək lazımdı. O da dedi ki, məşqçinin əvəzinə mən hamınızdan üzr istəyirəm.

- Son dövrədən gözləntiniz nədi? Komandanın psixoloji cəhətdən hazır olduğunu düşünürsünüzmü?
- Məni düşündürən məqam futbolçuların bərpasıdı. Çox sıx qrafikdə oynayırdıq. Ümumiyyətlə çempionat maraqlıdı. Qarşıda yüngül rotasiyalar edərək futbolçuları tam hazır vəziyyətə gətirəcəyik.

- Matçdan sonra futbolçular sevinirdilərmi, yoxsa bərabərliyə üzülənlər var idi?
- Oyundan sonra sevinənlər də var idi, narazı qalanlar da. Futbolçularımdan razı qaldım, xarakter göstərdilər. Xaraktersiz bir nəticə əldə edə bilmərik. Məcbur deyilik ki, hər il çempion olaq. Futbolda belə termin yoxdu. Biz sonadək mübarizə aparacağıq. Biz bu gün “Sabah”ın gücünü daha yaxşı bildik. Qalib gəlmək istəyiriksə, bugünkündən daha yaxşı oynamalıyıq.

- Bəhlulun yoxluğunda müdafiə xəttində dəyişiklər etməyə məcbur qaldız. Dani Boltun sağ cinahda rəqibinə uduzduğunu, Aleksey Kaşukun da zəif çıxış etdiyini gördük...
- Bu gun belə heyət çıxarmağı uyğun gördüm. Boltun zəif oynadığını deməzdim. Qarşısında çempionatın ən sürətli oyunçularından olan Maluda var idi. Ona qarşı normal çıxış etdiyini düşünürəm. Kaşuk da isə bəlkə də həyəcan var idi. Daha yaxşı oynaya bilərdi.

- Musa Qurbanlı start heyətində oynamağa hazırdı?
- Musa çox əziyyət çəkir. Bu cür davam etsə, start heyətində də yer ala bilər.