"Belə bir termin yoxdu ki həmişə “Qarabağ” qalib gəlməlidi" - Qurban Qurbanov

“Qarabağ” Misli premyer-liqasının 24-cü turunda “Sabah”la heç-heçə etdi - 1:1.

“Football-plus.az” xəbər verir ki, oyundan sonra meydan sahiblərinin baş məşqçisi Qurban Qurbanov mətbuat konfransında görüş haqda fikirlərini bildirib.

- Futbolçularıma təşəkkür edirəm. Oyunun sonlarına yaxın matçın sürəti artdı. Sanki bu matçda hansısa komanda məğlub olsaydı, çox üzülərdilər. Hər iki komanda 1 xal qazandı. Azarkeşlərimizə də təşəkkür edirəm. Sanki oyunun əvvəli bir az darıxdırıcı idi. Get-gedə matç daha da aktivləşdi.

- Murad Musayev “Sabah”ı çalışdıranda bu oyunlar daha maraqlı keçirdi. Hazırda Kurban Berdiyev və Vasili Berezutski “Qarabağ”a məğlub olmayıb. Bu faktda nəzər yetirmisinizmi?
- Böyük təcrübə keçmiş məşqçilərdi. Sabah yenə məğlub ola bilərik. Bu normaldı.

- Bəlkə analiz ediblər…
- Biz də analiz edirik. Belə bir termin yoxdu ki həmişə “Qarabağ” qalib gəlməlidi. Ümumən, komandadan razıyam. İşimizi mövsümlük görürük.

- 7-8 futbolçunun müqaviləsi bitir. Onlarla bağlı vəziyyət necədi?
- Hələ vaxtımız var. Ümumən futbol elə oyundu ki, fikirlərdə dəyişikliklər olur. İlin sonuna vaxt var. Bu mövsümə köklənmişik.

- Buraxdığınız qol epizodunu necə şərh edərdiniz?
- Bir az Matesula bağlı idi. Bəzi epizodlarda məsuliyyətli olmaq lazımdı.

- Sizcə, 1 xal qazandız yoxsa 2 xal itirdiz?
- 1 xal qazandıq. Xallarımızın üzərinə xal gəldi. Bununla da qazanmış olduq.

ƏSƏD SEYİDOV