Misli premyer-liqasının 14-cü turunun açılış qarşılaşmasında “Qarabağ” Zirə səfərində xal itirdi - 1:1.

“Football-plus.az” xəbər verir ki, oyunsonrası mətbuat konfransında qonaqların baş məşqçisi Qurban Qurbanov jurnalistlərin suallarını cavablayıb.

- Futbolçularıma və azarkeşlərə təşəkkür edirəm. Oyun keyfiyyətli olmasa da, gərgin mübarizə oldu. Hər iki komandanın futbolçuları güc itirdi. Oyunun sonlarına yaxın dinamika yox idi. İki tərəf də 1 xala layiq idi. Oyundan-oyuna daha çətin “Zirə” görürük. Rəşaddan hər oyunda sürpriz gözləyirik.

- Montiel iki mövqedə oynadı.
- Oyunun axarına görə belə oldu. Üç mövqedə oynamağı bacarır. Universaldı. Rotasiyalara görə belə alındı. “Zirə” təkbətək mübarizələrdə yaxşı oynayır, cəsarətli və fəaldılar. Çox razı qaldım. Özünü yaxşı tərəfdən göstərdi.

- “Ayaks”la oyunda start heyətində olmağa hazırdı?
- Yenə tam hazır deyil. Onun üçün 90 dəqiqə yenə çox oldu. İlyarımdı məşq edib, oynamayıb. Oyunun gedişində meydana çıxa bilər. 3 tur əvvəl 90 dəqiqə oynamışdı, üç gün sonra özünə gəldi (gülümsəyir). Daha yaxşı olacaq. Oyundan-oyuna daha hazırlıqlı olur.

- Mateusun yerinə, adətən, Bolt meydana daxil olurdu…
- Bolt oynasaydı, Yankoviç çıxa bilməyəcəkdi. Mateusla Leandronun əzələsində kiçik zədə var idi. Düşünülmüş addım idi.

- Zubir həmişə sakit olur. Bu dəfə aqressiv idi…
- Mən də, adətən, sakit oluram. Amma hərdən emosiyalarımı saxlaya bilmirəm. Zubir də nə üzünə əl atdı, nə başqa bir şey. Oyunun sonunda qalib gəlmək üçün belə etdi.

- “Ayaks”la oyuna komanda nə qədər hazırdı?
- Son oyunda sistem dəyişikliyi ediblər. Bu gün də oynayacaqlar. Bu oyunu gözləyək. Yenə dəyişiklik olsa, bizim üçün əlavə düşüncə olacaq. Şansa qaldıqda, başqa iki oyun da var. Rəqib də bunu düşünür.

- Niderlanda köməkçilərinizi göndərmisiz?
- Yox.

- Ramil Şeydayevin formasını bərpa edəcəyinə inanırsız? İstəyi var?
- İstəklidi. Daha çox şans versək, idman formasını daha tez bərpa edər. Çox vaxt buraxıb. Oyun sayı, dəqiqəsi vacibdi. Nə qədər məşq etsə də, oyun tam fərqlidi. Hücum xəttində olan hücumçu üçün oynamaq vacibdi. İstəklidi. Bəzən 2-ci heyət daha vacib olur. Məşqlərdə istədiyimiz tempi görə bilirik. Bütün oyunlarda oynaması şərt deyil.

MÜZƏFFƏR QULUZADƏ