“Bu 10 oyunu “Qarabağ”ın hər bir futbolçusu möhtəşəm keçirdi. Hər futbolçunun komandanın uğurunda payı var. Kimsə özünü doğrultmaya da bilər. Bu futboldu, belə hallar olur. Amma bütün futbolçular “Qarabağ”a böyük fayda verdi, tarixi uğura imza atdılar. “Qarabağ”ın bundan sonrakı missiyasını məşqçilər də başa düşür. Yeni futbolçular cəlb olunacaq. Bu proses yavaş-yavaş gedəcək. Məncə, işlər başlayıb. Çünki yeni transfer də ediblər, komandaya qoşulan daha bir futbolçu var. Yəqin ki, bir neçə futbolçunu da izləyirlər. İnanıram ki, “Qarabağ” birdən-birə yox, yavaş-yavaş futbolçuları, heyəti dəyişəcək və yeni komanda görəcəyik. “Qarabağ”dan gözləntilər həmişə böyük olub. Çünki bizi uğurları ilə sevindirib, ÇL həyəcanı yaşadıb. Buna görə də həmişəki “Qarabağ”ı görmək istəyirik. Amma azarkeşlər də başa düşməlidi ki, bu hərdən alınır, hərdən yox. Zaman lazımdı. İnanıram ki, Qurban Qurbanov ən yaxşısını etməyə çalışacaq. “Qarabağ” gələn mövsüm də ÇL-də mübarizə aparmaq istəyəcək. Bunun üçün ən azı çempionatda qalib olmalıdılar. Bundan sonra bütün fikirlərini ölkə çempionatına yönəldəcəklər. Hansı komanda çempion olarsa, avrokuboklarda uğurlar arzulayıram. Təki Avropada ölkəmizi təmsil edənlər ən azı “Qarabağ” qədər uğurlu olsunlar”.

“Qarabağ"ın liqa mərhələsindəki çıxışını ümümi dəyərləndirsək, qapıçı Koxalskidən tutmuş, əsas heyətin, demək olar, bütün oyunçularının yaxşı təsir bağışladığını deyə bilərik. Amma "Liverpul" və "Nyukasl" ilə oyunlarda hamısı çətinlik çəkirdi. Çünki bu səviyyədə rəqiblə oynamaq, belə sürətlə ayaqlaşmaq olduqca ağırdı. Dəyişikliklər mütləq olmalıdı. Gələn mövsüm üçün 4-5 səviyyəli legioner gətirilməlidi. Bu mövsümün gedişində də gördük ki, "Qarabağ"ın ehtiyat oyunçular skamyası keyfiyyət baxımından geniş deyil. Bütün yük 11-12 futbolçunun üzərinə düşür, onlar da bir neçə cəbhədə oynamağa güc çatdıra bilmirlər. Premyer-liqada liderliyi əldən verməsinin də əsas səbəbi elə budu. Rəhbərliyin Qurban Qurbanovla bağlı gözləntilərinə gəlincə, "Qarabağ"ı idarə edən adamlar bu sahədə böyük təcrübəyə malikdi. Qurban Qurbanov onlar üçün tapıntıdı. Uzun illər əl-ələ verib yaxşı bir sistem qurublar. Avropanın aparıcı ölkələrində elə klublar görmüşük ki, ÇL-i qazanıblar, amma növbəti mövsüm bütün turnirlərdə uğursuz olublar. Qurban Qurbanov da, "Qarabağ" rəhbərliyi də işini yaxşı bilir - inkişafdan qalmamaq, heyəti güclü saxlamaq, oyunçu satmaq, avrokuboklarda müntəzəm liqa mərhələlərində oynamağa çalışmaq... Mən təxminən belə görürəm gələcəyi. Bu komanda buralara məhz belə adekvat düşüncə tərziylə yola çıxdığı üçün gəlib çatıb. Hamı məsələni bir cür görür. Mənim üçün missiya anlayışı deyə bir şey yoxdu. Bir hədəf qoyulmalıdı. Prioritet həmişə ÇL olur. Konfrans, Avropa Liqasının gəlirləri ilə Çempionlar Liqasının gəlirləri arasında kifayət qədər fərq var. Məncə, ÇL-in liqa mərhələsinə yüksəlməyə köklənməlidilər. Sabit şəkildə üç mövsüm ÇL-də mübarizə apara bilsələr, klub olaraq çox böyüyə bilərlər. Həm gəlir mənasında - yaxşı pullar qazanıb keyfiyyətli futbolçular gətirə bilərlər. Çempion ola bilməsələr, Konfrans, ya da Avropa Liqasında oynasalar, heç kim zəmanət vermir ki, komanda 1/4 finala, yarımfinala qədər irəliləyəcək. Çünki orda da elə-belə komanda yoxdu. “Böyük beşlik”də oynayan komandalar var ki, onları keçməmək də mümkündü. “Qarabağ” kimi klubun hədəfi nə ola bilər? İnkişafdan geri qalmamaq. Bunun üçün də çalışırlar. Qurban Qurbanov həmişə araşdırır, dünya futbolunda tədbiq olunan yenilikləri imkan daxilində komandaya gətirmək istəyir. Qurban Qurbanovun qarşısına Avropa Liqasında 1/4 finala yüksəlmək hədəfi qoymaq real deyil. “Qarabağ”ı kim görür, möcüzə kimi baxır. Deyirlər ki, bu heyətlə, belə dəyərə malik futbolçularla necə “24-lüy”ə düşdülər. Bu mümkünsüzü həyata keçirdik. Amma bu o demək deyil ki, komanda gələn mövsüm də ÇL-də “24-lüy”ə düşəcək. Bütün komandalar qarşısına hədəf qoyur. Məsələn, bu mövsüm ÇL-də rəqiblərimiz olan “Napoli”, “Ayntraxt”, “Ayaks”, “Kopenhagen”, “Atletik”in “24-lüy”ə düşə bilməməsi o demək deyil ki, gələn mövsüm də düşməyəcəklər. Yəni hər mövsümün öz gerçəklikləri var. Ona görə də reallıq hissini itirməmək lazımdı”.