''Qarabağ'' bu mövsümkü performansı ilə futbolun nə dərəcədə sürprizlərlə bol olduğunu və bu idman növünə proqnoz verməyin necə çətin olduğunu bütün çılpaqlığı ilə bir daha ortaya qoyur.

Təmsilçimiz Çempionlar Liqasının əsas mərhələsinə vəsiqəni rəsmiləşdirdirdikdən sonra hamımızı yalnız ''görəsən, ''Qarabağ'' heç olmasa, bir qələbə qazana biləcəkmi'' sualı maraqlandırırdı. Amma Qurban Qurnamovun komandası ilk iki turda ''Benfika'' və ''Kopenhagen'' kimi heç də zəif olmayan rəqibləri yenməklə bütün Avropa futbolunu mat-məəttəl qoydu. Komandamız hazırda 6 xalla 6-cı pillədə qərarlaşıb və yalnız top-fərqinə görə ''Arsenal'', ''İnter'', PSJ, ''Real'', ''Bavariya'' kimi ''əjdahalardan'' geri qalır.

Bu arada məlum olub ki, ''Qarabağ''ın liqa mərhələsini ilk ''24-lük''də tamamlamaq və pley-offa qatılmaq şansı heç də az deyil. Bukmekerlər ''köhlən atlar''ın pley-offa yüksəlməsinə 1,60 əmsal verir. Eləcə də ''Opta''nın superkompyuterinin hesablamasına görə təmsilçimizin pley-off şansı 67 faizdi! Bu, kifayət qədər böyük göstəricidi.

Ötən mövsüm pley-offa yüksəlmək üçün 11 xal toplamaq kifayət etmişdi. Bu məntiqlə yola çıxsaq, ''Qarabağ''a qalan 6 oyunda 5 xal toplamaq yetərli olacaq. Hərçənd bu mövsüm 11-dən də az xalın yetərli olacağını istisna etmək olmaz.

Xatırladaq ki, ''transfermarkt''a görə ''Qarabağ''ın heyətinin dəyəri 24,8 milyon avrodu. Ağdamlılar bu göstəriciyə görə bu mövsüm ÇL-də mübarizə aparan 36 kollektivdən yalnız birini - ''Kayrat''I (12,7 milyon avro) üstələyir.