PSJ ikinci oyunda da “Arsenal”a şans vermədi - İCMAL
yarımfinal, cavab oyunu
PSJ – Arsenal 2:1 (1:0)
PSJ (Fransa): Donnarumma, Hakimi, Markinyos, Paço, Mendeş (Ramuş, 88), Ruis, Neveş, Vitinya, Due (L.Ernandes, 74), Kvaratsxeliya, Barkola (Dembele, 70).
Arsenal (London, İngiltərə): Raya, Timber (Uayt, 83), Saliba, Kivior, Lüis-Skelli (Kalafyori, 68), Parti, Rays, Edeqor, Saka, Martinelli (Trossar, 69), Merino.
Qollar: Ruis, 27 (1:0). Hakimi, 72 (2:0). Saka, 76 (2:1).
Vitinya 69-cu dəqiqədə penaltidən yararlana bilməyib (qapıçı).
Vərəqələr: Mendeş, 18. Rays, 26. Lüis-Skelli, 56. Kvaratsxeliya, 86. Kalafyori, 86. Saka, 86 – sarı.
Hakim: Feliks Svayer (Almaniya).
7 may. Paris. 47511 tamaşaçı.
İlk oyun – 1:0.
“Arsenal” cavab matçının ilk dəqiqələrindən irəli atılsa da, Donnarumma həmin gün karyerasının ən yaxşı oyunlarından birini keçirdi. İtaliyalı qapıçı ilk 8 dəqiqədə komandasını üç dəfə real qoldan xilas etdi!
Erkən qol vura bilməyən “Arsenal”ın təzyiqi yavaş-yavaş azalmağa başladı. Parislilərin ilk təhlükəli hücumu zamanı Kvaratsxeliyanın zərbəsindən sonra top tirə tuş gəldisə, ikinci təhlükəli hücum Ruisin baxımlı qolu ilə nəticələndi. İkinci hissədə “topçular” əsasən standart zərbələr hesabına təhlükə yaradırdı.
Maraqlıdı ki, fasilədən sonra da hücum edən “Arsenal”, qol vuran isə PSJ oldu. Dembele meydana çıxan kimi hesabına məhsuldar ötürmə yazdı və Hakimi fərqi iki topa yüksəltdi. Özü də nəzərə alaq ki, bu epzioddan cəmi 3 dəqiqə öncə Vitinya penaltini boşa verdi. Rayya onun zərbəsini dəf etməyi bacardı. “Arsenal”ın meydanı qolsuz tərk etməsi haqsızlıq olardı. Saka qollardan birinin əvəzini çıxdı. İngiltərəli vinger bu qoldan bir neçə dəqiqə sonra topu “çərçivə”nin üstündən yox, boş qapıya vursaydı, sonluq daha maraqlı və gərgin alınardı. Amma London nəhənginin bundan artığına gücü çatmadı. Artetanın komandası bütün turnirləri nəzərə almaqla ardıcıl 4-cü turnirdə mübarizəni yarımfinalda dayandırdı! PSJ isə son 5 ildə ikinci dəfə ÇL-in finalına yüksəldi.
Bombardirlər: Girassi (Borussiya D), Rafinya (Barselona) – 13, Levandovski (Barselona), Keyn (Bavariya) – 11.
Oyundan sonra
Luis Enrike, PSJ-nin baş məşqçisi:
“İnanılmaz emosiyalar yaşayıram. “Arsenal” xüsusilə ilk yarıda bizə yetərincə çətin anlar yaşatdı. Ancaq eyni zamanda əks-hücumlarda bizim də gözəl fürsətlərimiz oldu. İlk yarının böyük hissəsində oyunumuzu tapmağa çalışırdıq. Yaxşı ki, ilk qolu vuran tərəf biz olduq. Bu qol komandanın özünəinamını artırdı. Artetanın “Arsenal” qələbəyə daha çox layiq idi” fikri ilə razı deyiləm. Biz tam layiqli şəkildə finala yüksəldik. Donnarumma əla oynasa da, o, əvvəlki mərhələlərdə də bizi dəfələrlə xilas etmişdi. “Liverpul”la dueli xatırlamaq kifayətdi. PSJ uzun illərdi ÇL-də qələbə gözləyir və inanıram ki, bu il bu həsrətə son qoyulacaq. Klubun yaranış tarixi ilə mənim doğum tarixim üst-üstə düşür. Ümid edirəm ki, bu mistik əlaqə öz sözünü deyəcək”.
Mikel Arteta, “Arsenal”ın baş məşqçisi:
“Xarakter göstərdik. Cəsur və ağıllı futbol sərgilədik. Bu mövsüm ÇL-də bizdən daha yaxşı komanda olduğunu düşünmürəm. Hətta parislilər də bunu mənə söylədi. Amma reallıq bizə sevinməyə imkan vermir. Çox üzgünük. PSJ-ni finala yüksəlməsi münasibətilə təbrik edirəm. Amma biz hər iki oyunda onları üstələdik. Çünki hər iki qarşılaşmanın ən yaxşı oyunçusu onların qapıçısı oldu. Bu cütdə fərq yaradan futbolçu Donnarumma oldu. Çox yaxşı mübarizə apardıq. Oyunçularımla qürur duyuram. Sadəcə, bu gün bəxtimiz gətirmədi. “Arsenal” bu mövsüm müəyyən səviyyəyə malik olduğunu göstərdi. Ancaq bəzi məqamların üzərində işləməliyik. Vaxtilə PSJ-də oynadığımı nəzərə alsaq, finalda, təbii ki, parislilərə azarkeşlik edəcəm”.
Digər xəbərlər
