Startı yanvarın 22-də verilən Argentina çempionatının Apertura (açılış) mərhələsində fevralın 7-10-u aralığında 4-cü tur keçirildi.

"Football-plus.az" xəbər verir ki, 15 oyundan sonra yalnız bir komanda itkisiz irəliləyir.

Ötən ilin dekabrında müəyyənləşən Klausuranın çempionu La Plata “Estudiantes”i Aperturaya yaxşı başlayıb. Eduardo Domingesin komandası hesabat turunda maksimum xal qazandı. “Tələbələr” evdə “Deportivo Riestra”ya minimal hesabla qalib gəlməklə xal ehtiyatını 8-ə çatdırdı. Son çempion bu göstərici ilə A qrupunda topların fərqinə əsasən 3-cü yeri tutur.

Bu qrupda tura hərəyə 7 xal toplamaqla şərikli lider kimi başlayan komandalar fərqli nəticələr göstərdilər. “Lanus” evdə “Talyeres de Kordoba” ilə 1:1 hesabına razılaşdı. “Platense” öz meydanında “İndependyente”yə minimal hesabla uduzdu. “Veles Sarsfild” isə “Boka Xuniors”a üstün gəldi. Paytaxt derbisində bütün qollar fasilədən sonra vuruldu. “Boka Xuniors”un sabiq oyunçusu və baş məşqçisi Gilyermo Barros Skelottonun çalışdırdığı “Veles”in vingeri Pelleqrini üç dəqiqəyə dubl etməklə qonaqların işini çətinə saldı. Klaudio Ubedanın komandasının gücü yalnız son dəqiqələrdə təsəlli qolunu vurmağa çatdı. 2:1 hesabıyla qalib gələn “Veles Sarsfild” A qrupunda vahid liderliyi ələ aldı. “Boka Xuniors” isə 4-cü yerdən 6-ya düşdü.

Aperturanın ilk üç oyununda uduzan yeganə komanda olan “Rasinq” yeni mövsümün birinci mərhələsinə uğursuz start vermişdi. Nəhayət, vitse-çempion hesabına ilk xalları yazdı. Qustavo Kostas ilə gümüş medallara sahib çıxan komanda evdə “Arxentinos Xuniors”a 2:1 hesabıyla qalib gəldi. Bu qələbə avelyanedalıları B qrupunda 15-ci yerdən 13-ə qaldırdı.

Aperturanın ilk üç turunda maksimum nəticə göstərən “İndependyente Rivadaviya” B qrupunun vahid lideri idi. Alfredo Bertinin komandası uğurlu oyunlar seriyasına daha birini əlavə etdi. Rio Kuarto “Estudiantes”ini səfərdə bir qolla, daha dəqiqi, avtoqolla üstələyən “İndependyente Rivadaviya” çempionatın ilk 4 turdan sonra büdrəməyən yeganə iştirakçısı kimi qaldı.

Bu qrupda tura hərəyə 7 xal toplamaqla, uyğun olaraq, 2-3-cü yerləri bölüşməklə başlayan “Tiqre” ilə “River Pleyt” arasındakı matçın nəticəsi maraqla gözlənilirdi. Ölkə nəhəngi evdə oynayacağından 2-ci yerə çıxmaq şansı yüksək dəyərləndirilirdi. Lakin “Tiqre” paytaxt təmsilçisi və “River”in milyonlarla azarkeşinə şok yaşatdı. 4:1 hesabıyla qalib gələn Dieqo Dabovenin komandası 10 xalla mövqeyində qaldı. Marselo Qalyardonun komandası isə darmadağından sonra B qrupunda 4-cü yerə düşdü.

Bu qrupda 3-cü yerə 8 xalla “Belqrano”nun yüksəldiyini də qeyd edək.

qrup mərhələsi, 4-cü tur
Estudiantes LP - Deportivo Riestra 1:0
Karrilyo, 75.

Rasinq - Arxentinos Xuniors 2:1
Koneçni, 20. Solari, 44 – Qodoy, 47.

Lanus - Talyeres de Kordoba 1:1
Akino, 90+3 – Rio, 90+1.

Platense - İndependyente 0:1
Montyel, 64.

Veles Sarsfild - Boka Xuniors 2:1
Pelleqrini, 63; 66 - Sufyaurre, 90.

Atletiko Urakan - San Lorenso 1:0
X.Kaysedo, 50.

Estudiantes RK - İndependyente Rivadaviya 0:1
Antonini, 69-öz qapısına.

River Pleyt - Tiqre 1:4
Rivero, 89 – Serraqo, 6. D.Romero, 16. Russo, 49; 68.

Barrakas Sentral - Ximnasiya LP 2:0
Cappert, 35. İ.Tapya, 61.

Sentral Kordoba - Union 1:0
Santos, 76.

Aldosivi - Rosario Sentral 1:1
Kordero, 87 – Ovando, 4.

Belqrano - Banfild 1:0
Selarayan, 54.

Nyuellz Old Boyz - Defensa y Xustisiya 2:3
Kokkaro, 76. Salomon, 90+7 – Miritelyo, 31; 45+4. Portilyo, 63.

Sarmyento - Atletiko Tukuman 2:1
Marabel, 19. Çurin, 36 – M.Vilya, 71.

Ximnasiya M - İnstituto 1:0
Lensioni, 73.

A qrupu
1. Veles Sarsfild 4 3 1 0 6-3 10
2. Lanus 4 2 2 0 8-6 8
3. Estudiantes LP 4 2 2 0 4-2 8
4. Defensa y Xustisiya 4 2 2 0 4-2 8
5. Platense 4 2 1 1 4-3 7
6. Boka Xuniors 4 2 0 2 5-4 6
7. İndependyente 4 1 3 0 4-3 6
8. San Lorenso 4 2 0 2 4-4 6
9. Ximnasiya M 4 2 0 2 2-5 6
10. Union 4 1 1 2 5-3 4
11. Talyeres de Kordoba 4 1 1 2 5-6 4
12. Sentral Kordoba 4 1 1 2 1-2 4
13. İnstituto 4 0 1 3 3-6 1
14. Deportivo Riestra 4 0 1 3 1-4 1
15. Nyuellz Old Boyz 4 0 1 3 4-8 1

B qrupu
1. İndependyente Rivadaviya 4 4 0 0 7-3 12
2. Tiqre 4 3 1 0 10-3 10
3. Belqrano 4 2 2 0 4-2 8
4. River Pleyt 4 2 1 1 4-4 7
5. Sarmyento 4 2 0 2 4-4 6
6. Ximnasiya LP 4 2 0 2 5-6 6
7. Barrakas Sentral 4 1 2 1 3-2 5
8. Rosario Sentral 4 1 2 1 4-4 5
9. Atletiko Urakan 4 1 2 1 4-4 5
10. Arxentinos Xuniors 4 1 2 1 2-2 5
11. Banfild 4 1 1 2 3-4 4
12. Aldosivi 4 0 3 1 2-4 3
13. Rasinq 4 1 0 3 5-8 3
14. Atletiko Tukuman 4 0 2 2 3-5 2
15. Estudiantes RK 4 0 1 3 1-5 1

Bombardirlər: X.Kaysedo (Atletiko Urakan) - 4, M.Moreno (Lanus), D.Romero, Russo (hər ikisi “Tiqre”) - 3.