Bizon ölkə kubokunda 1/4 finalın ilk oyunları keçirildi. Sumqayıtda qol vurulmadı, yəni həm eyniadlı komanda, həm də “Zirə” yarımfinala vəsiqə baxımından eyni dərəcədə şanslıdı. Rəşad Sadıqov hər nə qədər gizlətməyə çalışsa da, “qartallar” eniş yaşayır. Onlar ötən tur “Sumqayıt”ı özündən irəli buraxdı. Kubokdakı mümkün qələbə bu komandaların növbəti turdakı qarşılaşmasının da yönünü müəyyənləşdirə, yəni “Zirə” “Sumqayıt”ın gözünü qorxuda bilərdi.

Əslində digər oyunun nəticəsi daha böyük maraq doğurdu. İş ondadı ki, hər kəs “Sabah”ın “Qəbələ”ni məğlub edəcəyini gözləyirdi. Çempionatda inamla turnir cədvəlinə başçılıq edən, son aylarda ancaq tərif eşidən “bayquşlar” bu dəfə heç bir mənada ümidləri doğrultmadı – nə oyun, nə də nəticə baxımından. Əksinə, Massumonun 29-cu dəqiqədə penaltini də boşa verdiyini nəzərə alsaq, “Qəbələ” qələbəyə daha yaxın idi. Çox güman, Valdas Dambrauskasa Masazırın soyuq havası ilə yanaşı, komandasının oyunu da təsir etmişdi; litvalı mütəxəssis donuq baxışlarını bir nöqtəyə zilləyib dayanmışdı.

Növbəti oyunda futbolsevərlər qol görə bildi. Şamaxını bürüyən sıx duman üzündən eyniadlı komandanın “Qarabağ”la oyunu estetik baxımdan qətiyyən zövq oxşamasa da, “şirlər” qələbə sayəsində yarımfinala bir addım yaxınlaşdı. Onsuz da çempionat yolu ilə avrokuboklara vəsiqə qazanmaq “Şamaxı” üçün xəyaldı. Kubok isə həmişə uğura aparan qısa yoldu. “Qarabağ”ı kubokun cavab görüşünə qədər çox sərt, ağır qrafikin müşayiət etməsi Ayxan Abbasovun komandasının uğur şansını bir qədər də artırır.

Bu mərhələnin son oyununda “Turan Tovuz”la “Kəpəz” üz-üzə gəldi. “Sumqayıt”, “Zirə”, “Sabah” və “Qarabağ” kimi, “Turan Tovuz” da kubokda sona qədər irəliləmək fikrindədi. Axı ötən ilin acı təcrübəsi var. Onda məhz “Sabah”ın finalda “Qarabağ” üzərindəki qələbəsi tovuzluların avrokubok arzusunu gözündə qoymuşdu. Səhvdən nəticə çıxaran Kurban Berdıyev və komandası bu dəfə yarımfinala çıxmaq yolunda ilk addımı atdı. “Kəpəz” isə bu məğlubuiyyətin əvəzini çıxa bilər. Onu da xatırladaq ki, cavab oyunları martın 3-4-də keçiriləcək.

Bizon Azərbaycan kuboku, 1/4 final, ilk oyunlar
Sumqayıt – Zirə 0:0
Sabah – Qəbələ 0:0
Şamaxı – Qarabağ 2:1
Turan Tovuz – Kəpəz 1:0

ORXAN