Beləliklə, bu gün keçirilən üç oyunla Bizon ölkə kubokunda 1/8 final mərhələsi arxada qaldı.

1/4 finala adlayan son üç komanda “Qəbələ”, “Sumqayıt” və “Kəpəz” oldu. 1/4 final mərhələsinin cütləri də bəllidi:

Şamaxı – Qarabağ
Sabah – Qəbələ
Turan Tovuz – Kəpəz
Sumqayıt – Zirə

Növbəti mərhələdə komandalar həm evdə, həm də səfərdə qarşılaşacaq. Elə bu sxem əsasında yola çıxıb, nəinki yarımfinal cütləri, hətta finalda hansı komandaların bir-biri ilə qarşılaşacağını da proqnozlaşdırmaq olar. Qeyri-adi nəsə baş verməsə, “Qarabağ” “Şamaxı”nı, “Sabah” “Qəbələ”ni keçəcək.

Deməli, turnir torunun solundan “Qarabağ” – “Sabah” yarımfinalı çıxacaq. “Bayquşlar”ın kubokun son finalında acımadan, əzazilcəsinə ağdamlıları məğlub etdiyini nəzərə alsaq, onların və Qurban Qurbanovun əvəz çıxmaqdan başqa yolu yoxdu. Qurban bəy dostu-qardaşı Rəşad Sadıqova güzəşt etməyən adamdı, “Sabah”dan acıq çıxmayacaq?! Beləliklə, mayın 13-də keçiriləcək finala xoş gəldin, “Qarabağ”!

Keçək turnir torunun sağına. “Turan Tovuz” – “Kəpəz” cütündə hər şey aydındı. Komandalar arasında aşkar səviyyə fərqi var və qışda həmin fərqin aradan qalxacağı ilə bağlı heç bir əlamət yoxdu. Digər cütdə nəyisə proqnozlaşdırmaq çətindi. Bununla belə, “Sumqayıt” – “Zirə” mübarizəsində yenə də “qartallar”dan yanayam. “Neftçi”ni mübarizədən kənarlaşdıran Rəşad Sadıqovun bu mərhələdə büdrəmək lüksü yoxdu. Hə, yarımfinalda Kurban Berdıyevi büdrətməsi çətin məsələdi. Çox güman, yarımfinal oyunlarının keçiriləcəyi aprelə qədər həm “Turan Tovuz”, həm də “Zirə” avrokuboklara vəsiqəyə iddialılar sırasında olacaq.

Həmin vaxt kim kubok yoluna bel bağlayaqsa, o da qalib gələcək. Bax, bu məqamda mən “Turan Tovuz” deyirəm. Odu ki, mayın 13-də keçiriləcək finalda “Qarabağ”ın rəqibi kimi tovuzluları görürəm. Yəni “Turan Tovuz” tarixində ilk dəfə finalda oynaya bilər və bu çox real variantdı! Daha finalın qalibini də siz proqnozlaşdırın.

ORXAN