Türkiyədə bu transfer dönəminin fəal klublarından olan “Fənərbaxça” hələ də Nqolo Kantedən vaz keçməyib.

Məlum olduğu kimi, klub rəsmiləri bu ay iki dəfə Səudiyyə Ərəbistanına yollanaraq bu transferi tamamlamaq üçün “Əl-İttihad”la danışıqlar aparmışdılar. Amma hər iki halda danışıqlar uğursuz alınmışdı. Səudiyyə Ərəbistanı nəhəngi əsas ulduzlarından birini pulsuz buraxmaq istəmir. Baxmayaraq ki, Kantenin “Əl-İttihad”la müqaviləsinin müddəti mövsümün sonunda başa çatacaq.

Yerli mənbələrin yazdığına inansaq, İstanbul nəhəngi 3-cü dəfə qarşı tərəflə əlaqə yaradıb. Bu dəfə konkret məbləğ də açıqlanıb. İddialara inansaq, “sarı-lacivərdlilər” müqavilə müddəti 5 aydan sonra bitəcək 34 yaşlı yarımmüdafiəçiyə görə 4 milyon avro təklif edib! “Əl-İttihad” dünən yerli çempionatın 19-cu turunda “Əl-Fateh” ilə qarşılaşıb. Klub rəsmiləri “Fənər”ə “bu oyunu yola verək, sonra sizin təklifinizi düşünəcəyik” cavabını verib. Kante bu mövsüm 25 rəsmi oyunda hesabına 2 qol, 1 məhsuldar ötürmə yazıb.

“Fənər”dən söz düşmüşkən, onu da bildirək ki, Dominik Livakoviçin taleyinə, nəhayət, aydınlıq gəldi. Məlum olduğu kimi, təcrübəli qapıçı mövsümün əvvəlində La Liqa təmsilçisi “Jirona”ya icarəyə verilmişdi. Amma onun İspaniya macərası əsl kabusa çevrildi. İlk aylarda oynamaq şansı qazanmayan xorvatiyalının sonradan Kataloniya klubunun çalışdırıcısı Miçel ilə münasibətləri korlandı. Nəticədə o, ilk dövrədə bir rəsmi oyuna da çıxmadı.

Bir ara sabiq klubu Zaqreb “Dinamo”suna dönmək arzusu ilə vətəninə qayıdan Livakoviçin bu istəyi də gerçəkləşmədi. Çünki klublar arasında anlaşma baş tutmadı. Kor-peşman İspaniyaya qayıdan Livakoviçin artıq “Jirona”nın planlarına daxil olmadığı bəlli oldu. Çünki bu klub “Barselona”dan Mark-Andre ter Ştegeni icarəyə götürdü. Dünən isə 30 yaşlı qapıçı arzusuna çatdı. “Dinamo” ilə “Fənər” arasında razılıq əldə olundu.

Türkiyə mətbuatının yazdığına inansaq. Zaqreb klubu sabiq qapıçısının mövsümün sonuna qədər icarəsi üçün “Fənər”ə 300 min avro ödəyəcək. Qarşıdan gələn dünya çempionatına görə klubsuz qalmaq və yığmadakı mövqeyini itirmək istəməyən Livakoviç daha öncə 2016-23-cü illərdə “Dinamo”nun şərəfini qoruyub. O, 2023-ün yayında 6,6 milyon avroya “Fənər”ə transfer olunmuşdu.

Türkiyə karyerasında ümidləri doğrultmayan Livakoviçin İstanbul nəhəngi ilə 2028-in yayına qədər müqaviləsi var.