Mərakeşdə keçirilən 35-ci Afrika Millətlər Kuboku (AMK) yanvarın 18-də başa çatdı.

"Football-plus.az" xəbər verir ki, bir gün əvvəl yarımfinalın məğlubları olan Misir və Nigeriya yığmaları 3-cü yer uğrunda matçda qarşılaşdılar. Bazar günü isə Seneqalla Mərakeş arasında keçirilən finalda qitə çempionu müəyyənləşdi.

final
Seneqal - Mərakeş 1:0 (0:0, 0:0, 1:0), əlavə vaxtda
Seneqal: E.Mendi, A.Mendi (İ.Sarr, 77), M.Sarr, Nyakate, M.Diuf (Yakobs, 107), L.Kamara (Sek, 77), İ.Qeye, P.Qeye, İ.Ndiay (Mbaye, 77), Cekson (Ş.Ndiay, 90), Mane.
Mərakeş: Bunu, Hakimi, Agerd, Masina (Əl-Yamik, 89), Mazraui (İqamane, 98), Əl-Hannus (Tarqallin, 80), Əl-Aynaui, Saybari (Salah-Eddin, 90+4), Dias (Ahomaş, 98), Ezzalzuli, Əl-Kaabi (Ən-Nəsiri, 80).
Qol: P.Qeye, 94.
Dias 90+24-cü dəqiqədə penaltidən yararlana bilməyib (qapıçı).
Vərəqələr: L.Kamara, 24. İ.Sarr, 90+9. M.Diuf, 90+10. E.Mendi, 90+21. Salah-Eddin, 90+21. Ən-Nəsiri, 112. M.Sarr, 113 - sarı.
Hakim: Jan Jak Ndala Nqambo (Konqo DR).
18 yanvar. Rabat. 66526 tamaşaçı.

3-cü dəfə qitə çempionatının finalında oynayan Mərakeş yığması yalnız bir dəfə - 1976-cı ildə Afrikanın ən güclü komandası olmuşdu. Seneqal isə son 4 qitə çempionatında 3-cü, ümumilikdə 4-cü dəfə finala çıxmışdı. Bukmeker kontorları turnirin təşkilatçısı olan Mərakeşin milli komandasını finalın favoriti kimi qiymətləndirmişdilər. Amma Seneqal son illər qitə çempionatının uğurlu komandası sayılırdı. Bu da var ki, cəzalı vəziyyətə düşən Diarra ilə zədələnən kapitan Kulibali finalda iştirak edə bilməyəcəkdi.

“Prins Mulay Abdalla Stedium”da keçirilən final çox uzun çəkdi. Bunun əsas səbəbi mübarizənin əlavə vaxta qədər uzanması ilə bağlı oldusa, digər ciddi səbəb də vardı. Həlledici oyun ümumilikdə bərabər mübarizə şəraitində keçdi. Mərakeşlilər qapıya daha çox zərbə endirsələr də, seneqallılar daha çox təhlükəli vəziyyət yaratdı. Lakin əsas vaxtda hesab açılmadı. Halbuki Seneqal yığması son dəqiqələrdə künc zərbəsindən sonra qapıya yol tapdı. Lakin Sekin Hakimiyə qarşı kobud oynadığını əsas gətirən referi qolu mübahisəli qərarla hesaba almadı. VAR-ın qərarı qüvvədə saxlaması azmış kimi, bir qədər sonra seneqallıların qapısına şübhəli penalti təyin olundu. Diufla mübarizədə Diasın yerə yıxılması “Teranq şirləri”ni özündən çıxardı. Pap Tiavın komandası qərara etiraz əlaməti kimi meydanı tərk etdi.

Bir neçə dəqiqəlik müzakirələrdən sonra seneqallılar meydana qayıtdılar. Amma AMK-nın tarixinə ardıcıl 5 oyunda qol vuran ilk futbolçu kimi düşən Dias milyonlarla mərakeşlini məyus etdi. Qapıçı Eduard Mendi turnirin bombardiri olan 26 yaşlı yarımmüdafiəçinin Panenkasayağı zərbəsini dəf etməkdə elə bir çətinlik çəkmədi. Bu epizodun 90+24-cü dəqiqədə qeydə alındığını da vurğulayaq.
Əlavə vaxt yenicə başlamışdı ki, Pap Qeye Hakimini arxada qoyaraq topu tirin altından tora qovuşdurdu. Necə deyərlər, seneqallılar hakimlərdən dəstək alan rəqibinin cavabını çox sərt verdilər.

Qalan vaxtda hücumlara çox enerji sərf edən Valid Reqraqinin komandasının cəhdləri nəticəsiz qaldı. Beləliklə, Mərakeş yığmasının bütün turnirlərdəki məğlubiyyətsiz oyunlar seriyası 23-də dayandı. “Atlas şirləri”nin qitə çempionluğu həsrəti 50 ilə çatdı! Seneqal isə tarixində 2-ci dəfə AMK-nın qalibi oldu.

3-cü yer uğrunda oyun
Misir - Nigeriya 0:0, p. – 2:4
Misir: Şobeir, Hani, Rabya, H.Fəthi, Sobhi, Zizo (Marmuş, 60), Laşin, Aşur, Salah, Trezeqe (Saber, 61), Məhəmməd (Adel, 73).
Nigeriya: Nvabili, Onyemaeçi, Oqbu, Acayi (Avaziem, 90+3), Osayi-Samuel (İvobi, 65), Onyedika, Simon, Dele Başiru, Çukvueze (Ecuke, 90+1), Onuaçu (Lukman, 46), Adams.

Yarımfinalların uğursuzları arasında keçirilən matçın ilk hissəsində tərəflərdən heç biri oyun planında üstün təsir bağışlamadı. Fasilə ərəfəsində Adams qapıya yol tapsa da, ona ötürmə verən Onuaçunun dirsəyi ilə Fəthiyə zərbə endirməsinə görə qol hesaba alınmadı. Qitə çempionatında qol və assist göstəriciləri, uyğun olaraq, 4-ə və 2-yə bərabər olan Osimhensiz oynayan nigeriyalılar 2-ci hissədə fəallaşdılar. Fasilədən sonra meydana çıxan Lukman qapıya yol tapdı, lakin onun da qolu qaydalar çərçivəsində vurmadığı müəyyənləşdi.

Adamsın oyun ərzində bir neçə epizodu dəyərləndirə bilmədiyini qeyd etməmək olmur. Erik Şellin çalışdırdığı komanda rəqibindən üstün olduğu matçın əsas və əlavə vaxtında qol vura biməməyin əvəzini penalti seriyasında çıxdı. Dele Başiru hədəfə düşə bilməsə də, Nvabili Misir yığmasının İngiltərədə çıxış edən iki aparıcı oyunçusunun - Salah ilə Marmuşun zərbələrini dəf etdi.

Bürünc medallar Nigeriya yığmasına qismət oldu. Hossam Hassanın çalışdırdığı Misir isə ardıcıl iki qitə çempionatında mükafatçıların sırasına düşə bilmədi. AMK-da keçirdiyi 6 oyunda 4 qolun və 1 məhsuldar ötürmənin müəllifi olan Salah 2011-ci ildən formasını daşıdığı milli komanda ilə yenə titula həsrət qaldı. Maraq üçün onun ötən müddətdə qitə çempionatında 5 dəfə iştirak etdiyini və 2 dəfə (2017, 2021) gümüş mükafatçı olduğunu da xatırladaq.

Bombardirlər: Dias (Mərakeş) - 5, Osimhen (Nigeriya), Salah (Misir) - 4.