Türkiyə futbolunun önəmli isimləri arasında yer alan Ümit Karanla bağlı qalmaqallı xəbər gəlib.

Bir ara məşqçilik sahəsinə atılan, son dönəmlərdə əsasən şərhçiliklə məşğul olan ötənlərin ünlü futbolçusu bir müddət öncə saxlanılmışdı. Özü də hava limanında. Belə ki, saxlanılan zaman Karan ölkəni tərk etməyə hazırlaşırmış. O, ünlü simalara qarşı narkotik maddələrin istifadəsi və satışı ilə bağlı aparılan araşdırma zamanı 23 nəfərlə birlikdə saxlanılmışdı. İfadəsi alındıqdan sonra isə Karan daha 13 nəfərlə birlikdə həbs edilmişdi.

Qarşıdakı günlərdə onların məhkəməsi olacaq. Digər 9 nəfər isə müəyyən şərtlər daxilində sərbəst buraxılıb. Bu arada Ümit Karanın narkotik testinin cavabı bəlli olub. Onun həm qan, həm də sidik analizi müsbət çıxıb!

Qeyd edək ki, 49 yaşlı Ümit Karan 2001-09-cu illərdə ''Qalatasaray''dakı çıxışı ilə populyarlıq qazanıb. O, İstanbul nəhəngində ümumilikdə 99 qol vurub və 3 çempionluq olmaqla 4 titul qazanıb.