“Bakı”nın sabiq hücumçusu Kokeni ağır cəzalar gözləyir.

"Football-plus.az" xəbər verir ki, o, 16 il müdətinə həbs cəzasına məhkum oluna bilər.

İspaniya və Fransa mənbələrinin məlumatına görə, əsl adı Serxio Kontreras Pardo olan keçmiş futbolçu narkotik maddələrin alınması və yayılması ilə məşğul olan qrup yaratmaqda suçlanır. İş üzrə məhkəmə bir neçə gün əvvəl Malaqa şəhərində başlayıb. Cinayət işində onun qardaşı və sevgilisi də daxil olmaqla 17 nəfər iştirak edir. Qeyd edək ki, Koke ilk dəfə 2019-cu ildə narkotik alverində iştirakına görə həbs olunub. Bu cinayətinə görə 1 il 8 ay həbs cəzası çəkib, 15 min avro cərimə ödəyib və 2021-ci ilin iyulunda şərti azadlığa buraxılıb. Onun bu dəfə 16 illik həbsə və 15 milyon avroya qədər cəriməyə məhkum edilmək ehtimalı var.

Xatırladaq ki, Koke “Bakı”da 2012-ci ilin fevralından iyununa qədər çıxış edib, Azərbaycan çempionatında 10 oyuna 2 qol, ümumilikdə isə 15 oyuna 4 qol vurub və ölkə kubokunu qazanıb. İndi 39 yaşında olan keçmiş hücumçu yetirməsi olduğu “Malaqa”, “Marsel”, “Sportinq” (Portuqaliya), “Aris”, “Hyuston Dinamo”, “Rayo Valyekano”, “Yan Reqensburq”, “Bluminq”, “Nort İst Yunayted” və “Veriya” klublarında da oynayıb. Futbolçu həyatını 2016-cı ildə “Aris”də başa vurub.