Ümit Karan: “Türkiyəli oyunçulara dəyər verilmir”
“Beşiktaş” fanatlarının son dönəmlərdə tez-tez istefasını tələb etdiyi və sərt tənqidlər yönəltdiyi başqan Ahmet Nur Çəbi srağagün mətbuat konfransı keçirib.
“Football-plus.az” xəbər verir ki, tənqidlərə bir-bir cavab verən Çəbi gündəmdə duran məsələlərə toxunub. İstefa vermək niyyətində olmadığını qətiyyətlə bildirən başqan transferi alınmayan Anderson Talişka və Serxio Ramos məsələsinə də toxunub. Onun sözlərindən belə çıxır ki, Ramosun keçidi iki il üçün “Beşiktaş”a 50 milyon avroya başa gələcəkdi. Maraqlıdı, görəsən, “Qalatasaray” Ramosun transferini necə bitirmək üzrədi? Əzəli rəqiblərin saxta sənədlər sayəsində transferlər həyata keçirdiklərini, onların bahalı oyunçuları bunun sayəsində guya ucuz qiymətə aldıqlarını vurğulayan Çəbi federasiyanı bu məsələni araşdırmağa çağırıb. O, uzun müddətdi yeni müqavilə ilə bağlı danışıq apardıqları Salih Uçanla Cenk Tosunun da durumuna toxunub:
“Salih Uçan bizim sayəmizdə Türkiyə yığmasına qədər yüksəldi. Ona görə də bizə hörmətlə yanaşmalıdı. Bizim təklif etdiyimiz məbləğ o dönəm üçün heç də pis deyildi. Onsuz da lazım olanı edəcəyik. Bir neçə görüş kerçirsək də, hələ ki anlaşma əldə olunmayıb. Topa vurduqları hər zərbəyə görə bizdən 1 milyon avro istəməsinlər! Düzdü, onlardan özümüzə qarşı hörmətsizlik görməmişəm. Hər ikisiylə də yenidən görüşəcəm. Onları itirmək istəmirəm. Xüsusilə də Cenk Tosun bizim markamızdı”.
Bu arada Çəbinin bu sözlərinə ötənlərin məşhur forvardı Ümit Karan maraqlı şəkildə cavab verib. Futbolçu kimi “Qalatasaray”da 2001-08-ci illərdə top qovaraq 3 çempionluq yaşayan, son dönəmlərdə baş məşqçi kimi fəaliyyət göstərən 46 yaşlı Karan türkiyəli oyunçulara əcnəbilər qədər dəyər verilmədiyini bildirib:
“Sən əcnəbiyə gözünü yumub 3-4 milyon avro verirsən, türkiyəli oyunçulara çatanda isə “bizim övlad” deyirsən. Müasir futbolda artıq “bizim övlad” anlayışı yoxdu. Belə şeylər bizim oynadığımız dövrdə idi. Çünki peşəkarlıq yox idi. Məsələyə həvəskarcasına yanaşırdıq. Hətta deyərdim ki, axmaq olmuşuq... Yönəticilər bizə boş kağızı göstərərək “qardaşım, narahat olma, sən imzanı at“ deyirdilər. Biz də dərhal qələmi götürüb imzamızı atırdıq. Axı niyə biz türk oyunçular klubla normal şəkildə danışıq apara bilmirik? Biz bir klubla “bazarlıq edən” kimi o dəqiqə “bax, həmin oyunçu pulgirdi” deyirlər. Əcnəbi oyunçuya 10 milyon avro verib gətiririk. Təki öz oyunçumuz qazanmasın. Niyə? Türkiyəli oyunçunun ailəsi, anası və atası yoxdumu? Ahmet Nur Çəbi son açıqlamasında hər şeyi futbolçuların boynuna yıxdı. Bu sözləri eşidən Salihin əhval-ruhiyyəsi pozulmayacaqmı? O, bundan sonra sənlə necə danışıq aparsın? Ümumiyyətlə, türkiyəli oyunçulara dəyər verilmir. Əcnəbilərə çatan kimi isə onlara çox yüksək dəyər verilir”.
Digər xəbərlər
