Afrika Millətlər Kubokunda artıq yarımfinal oyunları keçirilir.

"Football-plus.az" xəbər verir ki, turnirdə çıxış edən Misli premyer-liqasının təmsilçiləri üçün isə mübarizə başa çatıb. Söhbət Sessi d'Almeyda (Neftçi), Abdul Raşid Mumini (Sumqayıt) və Alfons Msanqadan (Şamaxı) gedir.

Sessi d'Almeyda Benin millisinin əsas heyət üzvüdü. Qrupda Konqo DR-ə qarşı 82, Botsvanaya qarşı 54 dəqiqə oynayan Sessi Məhəmməd Salahlı Misirlə 1/8 final oyununda 77 dəqiqə meydanda olub. Heç bir məhsuldar hərəkətlə yadda qalmayıb. Qeyd edək ki, Sessi Seneqalla qrup oyununu zədə səbəbindən buraxıb.

Abdul Raşid Mumini də d'Almeydanın komanda yoldaşıdı. O, Sessi ilə müqayisədə az oynayıb. Konqo DR ilə görüşdə 90 dəqiqə oynayan Mumini Botsvana ilə görüşdə ehtiyatda qalıb. Seneqalla matçda isə 85-ci dəqiqədə meydana çıxıb. Cəza səbəbindən Misirlə 1/8 final oyununu buraxıb.

Alfons Msanqa üçü 90 dəqiqə olmaqla 4 oyunun hamısında meydanda olub. Tanzanya millisinin üzvü bu 4 oyunda qələbə qazanmasa da, pley-off üzü görüb. 1/8 finalda isə turnirin favoritlərindən olan Mərakeş yığmasına məğlub olub – 0:1.

PSJ-nin müdafiəçisi Əşrəf Hakiminin məhsuldar ötürməsini “Real”ın yarımmüdafiəçisi Brahim Dias qola çevirib.

“Bizimikilər” artıq komandalarının düşərgəsinə qoşulub, yavaş-yavaş məşqlərə start verirlər.

MÜZƏFFƏR QULUZADƏ