Son dönəmlərdə İtaliyada türkiyəli futbolçular tez-tez adlarından söz etdirir.

Semih Kılıçsoy bir müddət öncə ''Kalyari''də qolları sıralamağa başlamışdı. İndi də ''Torino''da çıxış edən Əmirhan İlkhandan qol xəbəri gəlib. İtaliya kubokunun 1/8 finalında ''Torino'' səfərdə ''Roma'' ilə qarşılaşıb. Məhsuldar və dramatik keçən matçda həlledici qolu məhz türkiyəli vinger vurub.

Qonaqların heyətində Çe Adams dubl edib. Onun ilkə qoluna ''Roma''da Mario Ermoso, ikinci qoluna Antonio Arena cavab verib. Hər şey 2:2-lik bərabərliyə və oyunsonrası penaltilər seriyasına doğru gedirdi. Amma 90-cı dəqiqədə səhnəyə Əmirhan çıxıb. ''Beşiktaş''ın yetirməsi künc zərbəsi zamanı qapıçıdan dönən topu tora göndərməklə komandasına mühüm qələbə qazandırıb. Bu, Əmirhanın cari mövsümdə 8-ci rəsmi oyunda ilk qoludu.

2022-ci ildə 4,9 milyon avro qarşılığında ''Beşiktaş''dan ''Torino''ya gələn 21 yaşlı futbolçu 2022/23-ün ikinci dövrəsini ''Sampdoriya''da, 2023/24-ü isə ''İstanbul BŞ''də icarə əsasında keçirib. Onu da bildirək ki, ''Torino'' İtaliya kubokunun növbəti mərhələsində ''İnter'' ilə qarşılaşacaq.