A seriyasında olduqca zəif mövsüm keçirən və düşmə zonasında qərarlaşan “Sampdoriya” heyətini iki türkiyəli futbolçu ilə gücləndirib. Amma onların hər ikisi elə İtaliya çempionatında çıxış edirdi. Söhbət Əmirhan İlkhanla Koray Güntərdən gedir.

Football-plus.az xəbər vrir ki, “Beşiktaş”ın yetirməsi olan 18 yaşlı Əmirhan ötən yay böyük ümidlərlə 4,5 milyon avroya “Torino”ya transfer olunmuşdu. Amma Turin təmsilçisində onun işləri qaydasında getmədi. Yeni mühitə uyğunlaşmaqda və özünü göstərməkdə çətinlik çəkən istedadlı vinger əsas heyət üzvünə çevrilə bilmədi.

Bu azmış kimi, dekabrın sonlarına yaxın “Kremoneze”yə qarşı hazırlıq oyununda zədələnərək bir aylığa sıradan çıxdı. Bir müddətdi məşqlərə başlayan İlkhan icarə əsasında mövsümün sonuna qədər Genuya təmsilçisində top qovacaq. Əmirhan “Torino”nun heyətində cəmi 4 rəsmi oyunda ümumilikdə 86 dəqiqə meydanda oldu.

Koray Güntərə gəlincə, 28 yaşlı mərkəz müdafiəçisi 2019-dan bəri “Verona”da çıxış edirdi. Onun mövsümün sonunda başa çatmalı olan müqaviləsi noyabrda 2025-ə qədər yenilənmişdi. O da Əmirhan kimi mövsümün sonuna qədər icarə əsasında “Sampdoriya”da oynayacaq.

“Sampdoriya” Əmirhandan fərqli Korayı daimi əsasda transfer edə bilmək hüququnu da ələ keçirib.

Xatırladaq ki, daha öncə Dortmund “Borussiya”sı, “Qalatasaray” və “Cenoa”da top qovan Koray bu mövsüm “Verona”da 14 rəsmi oyunda 1 qol, 1 məhsuldar ötürmə ilə fərqlənib