“Yanvarın 4-dən təlim-məşq toplanışına başlamışıq. Yüklənmələr çoxdu. Qəbələdə hazırlıq keçmək üçün əla şərait var, bu səbəbdən heç hara getmədik. Burda hər şey bizi qane edir: meydançaların vəziyyəti, istirahət etmək imkanları. Bu baxımdan hər şey yaxşıdı. İlk yoxlama oyununu "Kəpəz"ə qarşı keçirdik və qalib gəldik. Aydın məsələdi ki, səhvlər çox oldu. Birinci oyun idi. Hesab edirik ki, daha yaxşı çıxış etməliyik. Hamının vaxtı azdı, təxminən iki həftədən sonra çempionat başlayır. Odu ki, qısa vaxt ərzində həm fiziki, həm də oyun kondisiyalarımızı bərpa etməliyik. Çempionata yaxşı hazırlaşıb bizim üçün çox vacib olan xalları qazanmalıyıq”.

“Akinadeyə "Kəpəz"lə oyunda şans verdik. Aydın məsələdi ki, ona hələ vaxt lazımdı. Xüsusən də hücumameyilli futbolçulara uyğunlaşmaq üçün daha çox vaxt tələb olunur. Müdafiəçi Seydina Keyta isə təəssüf ki, xəstələnmişdi. Bu səbəbdən iki gün məşqlərdə iştirak edə bilmədi. "Kəpəz"lə oyunda risk etmədik və onu oynatmadıq. Yeni transferlərin işə yanaşmasından razıyıq. Əsas odu ki, komandaya tez uyğunlaşsınlar. Hər ikisi təcrübəli futbolçudu. İnanıram ki, qısa vaxt ərzində komandaya uyğunlaşacaqlar”.

“Bəzi mövqelər var ki, onları gücləndirməliyik və bunun üzərində işləyirik. Klubumuzun direktoru Səbuhi Səfiyarlı bu məsələlər üzərində səylə çalışır. Bu istiqamətdə işlərimizi diqqətlə davam etdiririk. Çünki səhvə yol vermək olmaz. Ümid edirəm ki, qısa vaxt ərzində transferləri yekunlaşdıracağıq və yeni gələnlər komandaya qoşulacaqlar. Qarşıda daha iki oyunumuz var — yanvarın 14-də ‘Araz-Naxçıvan’ və 18-də ‘Baku Sportinq’lə qarşılaşacağıq. İnanıram ki, hər şey yaxşı olacaq”.