“Qəbələ” üç gündü qış toplanışına başlayıb. Birinci liqanın lideri toplanış dövründə üç yoxlama oyunu keçirmək planını da açıqlayıb. Komanda ilə bağlı daha geniş bilgi almaq üçün baş məşqçi Kaxaber Sxadade ilə danışdıq.

- Təlim-məşq toplanışına başladız. Hazırlığı necə dəyərləndirirsiz, planlarınız nədi?
- Yanvarın 9-da Qəbələdə bir araya gəldik və mövsümün ikinci yarısı üçün hazırlığa başladıq. Burda yaxşı toplanış üçün hər cür şərait, gözəl meydançalar var. Hazırlıq dövründə Qəbələdə olacağıq. Gündə iki dəfə məşq edirik. Yanvarın 14-ü, 19-u və 23-nə yoxlama oyunları planlaşdırmışıq. Hələ ki hər şey planauyğun şəkildə gedir.

- Premyer-liqada çalışan məşqçilər hazırlıq müddətinin azlığından şikayətlənir. Qış hazırlığı üçün yetərincə vaxtınız varmı?
- Heç nədən gileylənmirik. Futbolçulara istirahət dövründə hazırlaşmaq üçün tapşırıqlar vermişdik. İndi isə sərəncamımızda olan vaxtdan maksimum yararlanmalıyıq.

- Yoxlama görüşlərini güclü klublara qarşı keçirəcəksiz, yoxsa sizin üçün fərqi yoxdu?
- Bəli, biz artıq fasiləyə yollananda toplanışın planlarını cızmışdıq. Üç yoxlama oyunu nəzərdə tuturduq.

- “Neftçi” hazırda Qəbələdə toplanış keçir. Sizə yoxlama oyunu keçirməyi təklif etsə də, siz istəməmisiz. İmtinanızın səbəbi nədi?
- “Neftçi”nin də Qəbələdə toplanış keçdiyini bilirik. Yanvarın 6-dan burdadılar. Onların da hazırlıq planı var, bizim də. Ona görə də “Neftçi” ilə yoxlama oyunu keçirməyimiz mümkün deyil. Biz ilk yoxlama oyununu əvvəlcədən planlaşdırdığımız kimi yanvarın 14-də keçirəcəyik.

- Qış dönəmində hansı mövqeləri gücləndirmək fikriniz var? “Gözaltı etdiyiniz” yerli və ya əcnəbi futbolçular varmı?
- Komandaya daim gəlib-gedənlər olur. Komanda da canlı orqanizmdi. Bəzi oyun elementlərini yaxşılaşdırmaqla bağlı planlarımız var. Amma qışda futbolçu cəlb etmək asan deyil. Xüsusən də birinci liqada yaxşı futbolçularla güclənmək çətindi. Müəyyən oyunçuların namizədliyini gözdən keçiririk, görək necə alınır. Onsuz da rəqabətədavamlı komandamız var. Güclənmə olacaqsa, hamı xəbər tutacaq. Hələ ki konkret bir variant yoxdu.

- “Qəbələ” premyer-liqaya ən yaxın komandadı. İkinci yarıda işiniz bir qədər yüngülləşəcək, yoxsa əksinə?
- Çox sevinirəm ki, qış fasiləsinə birinci pillədə yollandıq. Amma bu hələ başlanğıcdı. Bundan sonra işimiz daha çətin olacaq. Çünki başqa komandaların liderə qarşı oynamaq motivasiyası həmişə yüksək olur. Rəqiblərimiz ikiqat, üçqat motivasiya ilə oynayacaqlar. Ona görə də düşünürəm ki, rahat olmamalıyıq. Üzərimizdə fiziki və psixoloji təzyiq artacaq. Hər oyun çətin olacaq, buna hazırlaşmalıyıq.

RÖYANƏ OĞUZ