Sizi “Turan Tovuz”un qış hazırlıq planıyla tanış etmişdik.

Xatırladaq ki, “bozqurd” sabah Türkiyəyə yollanacaq. Komanda Antalyanın Bələk bölgəsində yerləşən “IC Santai Belek” otelində məskunlaşacaq. Qardaş ölkədəki toplanış yanvarın 18-dək davam edəcək. Baş məşqçi Kurban Berdıyev hazırlıq prosesi çərçivəsində komandanı iki yoxlama oyununda sınaqdan keçirəcək.

Maraqlıdı, bəs, bir ildi zədəli olduğuna görə tovuzlulardan ayrı düşən, Portuqaliyada müalicə olunandan sonra ötən ay Azərbaycana qayıdan Denis Marandiçi bu toplanışda iştirak edə biləcəkmi?

Klubun mətbuat xidmətinin rəhbəri Süleyman Tağıyevin “Football-plus.az”a verdiyi məlumata görə, moldovalı komandayla birgə Türkiyəyə yollanacaq. O, ilk mərhələdə fərdi şəkildə məşq edəcək. Marandiçinin komandayla birgə məşqlərə nə vaxt qoşulacağına isə mövcud duruma əsasən qərar veriləcək.

Xatırladaq ki, 2024-cü il dekabrın 3-də keçirilən “Turan Tovuz” – “Sabah” matçında moldovalı futbolçunun ayağı sınmış, meydançanı təcili tibbi yardım maşınında tərk etmişdi.

KƏNAN BAHADIR