''Flamenqo''nun və Uruqvay yığmasının yarımmüdafiəçisi Corcian de Arraskaeta ''Amerikanın kralı'' mükafatının bu ilki qalibi olub.

"Football-plus.az" xəbər verir ki, bu mükafat Uruqvayın məşhur ''El Pais'' nəşri tərəfindən təqdim olunur. Mükafat hər ilin yekunlarına əsasən Amerika liqalarında çıxış edən futbolçulara təqdim olunur.

Düşünmək olardı ki, bu il bu mükafatı qazanmağa əsas namizəd Lionel Messidi. Argentinalı superulduz bu mövsüm əla performans sərgiləyərək ''İnter Mayami''yə tarixinin ilk çempionluğunu qazandırdı. Amma Amerikanın 16 ölkəsindən olan ümumilikdə 264 jurnalist arasında aparılan sorğuda De Arraskaeta 62,8 faiz səs toplayaraq böyük fərqlə birinci olub. Messi 14,8 faiz səslə ikinci, ''Rasinq Avelyaneda''nın üzvü Adrian Martines 5 faiz səslə 3-cü pilləni tutub. De Arraskaeta çox uğurlu mövsüm keçirərək ''Flamenqo'' ilə dörd titul qazanıb. O, Braziliya çempionatı, Libertadores kuboku, Braziliya kuboku və Rio de Janeyro ştat çempionatının qalibi olub. 31 yaşlı futbolçu eyni zamanda Libertadores kubokunun ən yaxşı futbolçusu seçilib və ''Flamenqo''nun bu mövsüm ən çox qol vuran və ən çox məhsuldar ötürmə verən oyunçusu ünvanını qazanıb.

''Qızıl top''un səkkizqat qalibi olan Messi indiyə qədər heç vaxt ''Amerikanın kralı'' mükafatını qazanmayıb. 2024-cü ildə hazırda ''Zenit''in şərəfini qoruyan ''Botafoqo''lu Luis Enrike qalib olmuşdu.