58 (!) yaşlı futbolçu özünə yeni klub tapdı
Dünyanın ən yaşlı peşəkar futbolçusu statusunda olan Kuzuyoşi Miura ilə bağlı yeni maraqlı xəbər var.
"Football-plus.az" xəbər verir ki, o, Yaponiyanın 3-cü liqa təmsilçisi ''Fukuşima Yunayted'' ilə müqavilə imzalayıb.
Karyerasının 41-ci mövsümünə qədəm qoymağa hazırlaşan 58 yaşlı Miura yeni müqaviləyə imza atmasının ardından bunları deyib:
''Yaşlandıqca futbola olan sevgim və istəyim dəyişmir. ''Fukuşima Yunayted'' rəhbərliyinə mənə bu fürsəti verdiklərinə görə minnətdaram. Birlikdə yeni bir tarix yazmağa çalışacağıq''.
Ölkəsində ''Kral Kazu'' ləqəbi ilə tanınan Miura 1980-ci illərin ortalarından başlayaraq ardıcıl 40 ildi ki, peşəkar futboldadı. O, karyerasına hələ 1986-cı ildə Braziliya təmsilçisi ''Santos''da start verib. Bundan başqa müxtəlif illərdə Avstraliya, İtaliya və Xorvatiyada da top qovub. Miura ''Yokohama''nın əfsanəsi sayılır. Əslində o, müqavilə ilə indiyə qədər də bu kluba məxsusdu. Son illərdə oynadığı bütün klublarda icarə əsasında top qovur.
1992-də Asiyada ilin futbolçusu seçilən, eləcə də 1996-da Yaponiya çempionatının bombardiri olan Miura Yaponiya yığmasında 89 oyun keçirib. Maraqlıdı ki, o, Yaponiyanın futzal yığmasında da 6 oyun keçirməyə macal tapıb.
