Kadzuyoşi Miura futbol dünyasını təəccübləndirməkdə davam edir. O, 55 (!) yaşında da top qovmaq həvəsindədi.

Yəqin yaponiyalının dünya futbolunda ən yaşlı peşəkar futbolçu olduğunu bilirsiz. “Yokohama” fevralın 26-da 56 yaşı tamam olacaq hücumçunu icarəyə verib. Miura bu mövsümün sonuna qədər Portuqaliyanın ikinci divizionunda çıxış edən “Oliveyrense”də top qovacaq. Başqa sözlə, 24 ildən sonra yenidən Avropada çıxış edəcək. Asiyalı bu qitədə sonuncu dəfə 1999-cu ildə “Dinamo”da (Zaqreb) çıxış etmişdi.

1967-ci ildə doğulan Kadzuyoşi ötən əsrin 80-ci illərində Braziliyada top qovub: “Santos” və “Palmeyras”ın formasını geyməklə ilk yaponiyalı legioner kimi tarixə düşüb. 1990-2000-ci illərdə milli komandada 89 oyuna 55 qol vuran hücumçu DÇ-1998-in seçmə turnirində ən yaxşı bombardir olsa da, baş məşqçi onu Fransada keçirilən mundiala aparmayıb. Maraqlıdı ki, qərarını Kadzuyoşinin bir qədər yaşlı olması ilə izah edib. Halbuki futbolçunun onda 31 yaşı vardı...

Ekzotik karyeraya malik olan Miuranın yeni komandasında amplua üzrə əsas rəqibi Entoni Karterdi. Maraqlıdı ki, 28 yaşlı futbolçu Kadzuyoşi 1993-cü ildə Asiyanın ən yaxşı oyunçusu seçilərkən hələ dünyaya gəlməmişdi...