Yaponiyanın tanınmış forvardlarından olan Kazuyoşi Miura Portuqaliyanın 2-ci liqa təmsilçisi ''Oliveyrense''yə transfer olunub.

İlk baxışdan burda qeyri-adi heç nə yoxdu. Amma bu keçidi qeyri-adi edən odu ki, Miuranın nə az, nə çox – düz 55 yaşı var! İndiyə qədər vətənindən başqa ''Santos'', ''Palmeyras'', ''Koritiba'', Zaqreb ''Dinamo''su və ''Sidney''də top qovan ''Kral Kazu'' ləqəbli futbolçu artıq icarə əsasında karyerasını Portuqaliyanın aşağı liqasında davam etdirəcək. Peşəkar karyerasına hələ 1986-cı ildə start verən Miuranın fevralın 26-da 56 yaşı tamam olacaq. Onun son klubu ''Yokohama'' idi. Transferi ilə bağlı açıqlama verən Miura 60 yaşına qədər oynamaq istədiyini deyərək bunları əlavə edib: ''Yeni bir ölkəyə gəldim. Çox çalışaraq hər kəsə necə oyunçu olduğumu göstərəcəm''. Qeyd edək ki, Miura 1990-2000-ci illərdə formasını geydiyi Yaponiya yığmasında isə 89 oyuna 55 qol vurub.