Konte “Napoli” ilə ikinci titulunu qazandı - İtaliya Superkubokunun formatı gələn il də dəyişəcək
Dekabrın 22-də Səudiyyə Ərəbistanında İtaliya Superkubokunun qalibi müəyyənləşdi.
"Football-plus.az" xəbər verir ki, 38-ci dəfə təşkil edilən matçda “Napoli” ilə “Bolonya” qarşılaşdı. Ər-Riyadda baş tutan finalın qalibi favorit sayılan komanda oldu.
final
Napoli - Bolonya 2:0 (1:0)
Napoli: Milinkoviç-Saviç, Di Lorentso, Rrahmani, Juan Jezus (Buoncorno, 84), Spinatsola (Qutyerres, 68), Lobotka, Elmas (Lanq, 68), Maktominey, Politano, Neres (Matsokki, 78), Höylunn.
Bolonya: Ravalya, Holm, Heggem, Lukumi, Miranda, Pobeqa, L.Ferqyuson (Dallinqa, 69), Odqor (Moro, 46), Orsolini (Dominges, 80), Kambyaqi (Rou, 69), Kastro (İmmobile, 80).
Qollar: Neres, 39 (1:0). Neres, 57 (2:0).
Vərəqələr: Heggem, 44. Kambyaqi, 50. Holm, 78. Politano, 79 - sarı.
Hakim: Andrea Kolombo.
22 dekabr. Ər-Riyad. 15000 tamaşaçı.
Bir daha xatırladaq ki, 2023-cü ildən Superkubokun formatında dəyişiklik edilib. İtaliya çempionu ilə ölkə kubokunun son qalibi arasında keçirilən bir oyundan ibarət mübarizənin əvəzinə 4 komandanın iştirakı ilə mini-turnirin təşkilinə qərar verilib. Yenə Səudiyyə Ərəbistanının evsahibliyi etdiyi turnirin reqlamentinə əsasən, yarımfinalın ilk oyununda A seriyasının son çempionu “Napoli” ölkə kubokunun finalçısı “Milan”la qarşılaşmış və 2:0 hesabıyla qalib gələrək finalın ilk iştirakçısı olmuşdu. İtaliya kubokunun sahibi “Bolonya” isə vitse-çempion “İnter”ə əsas vaxtı 1:1 hesabıyla sona çatan digər yarımfinalda penalti seriyasında üstün gəlmişdi - 3:2.
Onu da xatırladaq ki, “Napoli” bu mövsüm A seriyasında noyabrın 9-da səfərdə “Bolonya”ya iki cavabsız top buraxaraq uduzmuşdu. Buna baxmayaraq, finalın favoriti İtaliyanın son çempionu sayılırdı. Bukmeker kontorları neapollulara üstünlük verərkən, çox güman, son oyunlarda əla çıxışı ilə yadda qalan Bernardeskinin zədələnməsini də nəzərə almışdılar.
Proqnoz doğruldu. Görünür, Antonio Konte həmin məğlubiyyətə səbəb olan amilləri yaxşıca dəyərləndirmiş, bolonyalılara qalib gəlməyin yollarını axtarıb tapa bilmişdi. “Əl-Əvval Park” stadionunda baş tutan həlledici matç ümumilikdə “Napoli”nin diqtəsi ilə keçdi. Neapollular rəqibindən oyun planında üstün idilər. Onlar hesabı erkən aça bilərdilər. Lakin topu Maktomineydən alan Elmasın zərbəsi qapının yaxın küncünə yönəlmədi. Az sonra Neresin qapıya istiqamətləndirdiyi Spinatsolanın hesabı açmasına müdafiəçi mane oldu. Nəhayət, gözlənilən qol fasilə ərəfəsində reallaşdı: məsuliyyəti üzərinə götürən Neres topu güclü zərbə ilə qapının uzaq küncünə yönəltdi.
İlk hissənin sonunda hesabı açan Kontenin komandası bundan sonra da oyuna diqtə edən tərəf oldu. “İnter”lə oyunun qəhrəmanı olan Ravalya Höylunn ilə Rrahmaninin zərbələrini dəf etməklə oyundaşlarını az da olsa, ilhamlandırdı. Lakin hücuma meyl etməyə başlayan bolonyalılar rəqibin güclü pressinqi qarşısında səhv edərək topu ikinci dəfə qapısında gördülər: Lukumini aldadaraq arxada qoyan Neres topu qapıçının başı üzərindən tora qovuşdurdu. Qalan vaxtda hesab darmadağın həddinə çata bilərdi. Höylunnun matçın qəhrəmanı olan Neresə ötürməsi dəqiq alınmadı, Maktomineyin sevinməsinə rəqib oyunçu mane oldu. Ən yaddaqalan epizodda isə Politano bir neçə metrdən boş qapıya yol tapa bilmədi.
Beləliklə, İtaliya Superkubokunun finalında ilk dəfə oynayan “Bolonya”nın daha bir uğura gücü çatmadı. 2:0 hesabıyla qalib gələn “Napoli” isə bu il azarkeşlərinə əla Milad hədiyyəsi etdi!
Yeri gəlmişkən...
İtaliya Superkuboku gələn ildən əvvəlki formatla keçiriləcək. Bunu A Seriyasının prezidenti Etsio Simonelli bəyan edib. O, Italia 1 telekanalına açıqlamasında turnirin növbəti mövsümdən yalnız finaldan ibarət olacağını, həlledici matçda İtaliya çempionu ilə ölkə kubokunun sahibinin qarşılaşacağını bildirib.
Faktlar
* “Napoli” 3-cü dəfə İtaliya Superkubokunun qalibi oldu. Cənublular bu turnirdə daha əvvəl 1990 və 2014-cü illərdə qalib gəliblər.
* Superkuboku ən çox qazanan komanda “Yuventus”du - 9 dəfə. “Milan”la “İnter”in hesabında hərəyə 8 superkubok var, “Latsio” isə 5 dəfə turnirin qalibi olub.
* Konte “Napoli” ilə ikinci titulunu qazandı. O, komandanı ötən mövsüm A seriyasında qələbəyə daşıyıb.
* Konte məşqçi karyerasında 10-cu titulunu qazandı. İtaliyalı mütəxəssis bundan əvvəl “Yuventus”u üç, “Çelsi”, “İnter” və “Napoli”ni bir dəfə ölkə çempionatında, “Yuventus”u iki dəfə İtaliya superkubokunda, “Çelsi”ni isə bir dəfə İngiltərə kubokunda qələbəyə daşıyıb.
Oyundan sonra
Antonio Konte, “Napoli”nin baş məşqçisi:
“Oyunçularımızı turnirdəki qələbə münasibətilə təbrik edirəm. Bu kuboku azarkeşlərimizə hədiyyə etmək, onları Milad bayramı ərəfəsində sevindirmək istəyirdik. Həqiqətən də bayramı titulla qeyd etmək çox sevindiricidi. Son mövsümdə skudettonu, indi isə superkuboku qazandıq. Bu titullara çox sayda güclü komandaları qabaqlayaraq sahib çıxmışıq. Unutmayaq ki, “Napoli” iki il əvvəl Superkubokun finalında “İnter”ə uduzmuşdu. Yaxşı bilirik ki, futbolda qalib olmaq böyük əhəmiyyət daşıyır. Heç kim sənin finalda meydana çıxıb-çıxmadığına diqqət yetirmir və bunu finallarda bir neçə dəfə məğlubiyyətin acısını dadmış sabiq futbolçu deyir. Mən dünya çempionatının və Avropa çempionatının gümüş mükafatçısıyam, bunlardan başqa, bir çox digər turnirlərin finalında da uduzmuşam. Belə aqibət adamın ürəyini ağrıdır. Axı turnirdə uzun yol qət etməyinə baxmayaraq, tortun üzərinə albalını qoya bilmirsən. Bu turnirdə “Bolonya”nın, xüsusilə də həmkarım İtalyanonun gördüyü işi qeyd etmək istəyirəm. Biz ötən mövsüm heç də çox güclü sayılmayan heyətlə çempion ola bilmişdik. Bu mövsüm heyətimizə bir sıra yeni oyunçular qoşulub. Buna baxmayaraq, hələ də çempionatda liderlik etməyə tam hazır deyilik. Çempionlar Liqasının növbəti mövsümündə də oynamağa can atırıq və bu vəzifəni yerinə yetirməyin çox çətin olacağını bilirik. Onu da yaxşı bilirik ki, böyük əmək sərf etməklə çox şeyə nail olmaq mümkündü. Finalda yaratdığımız təhlükəli vəziyyətlərə baxsaq, daha effektiv ola bilərdik. Hər halda, bir çox planlarda əla oyun keçirdik. Neresin vurduğu ilk qol çempion kimi şücaət göstərmək oldu. “Bolonya”ya necə problemlər yaşada biləcəyimizi əməlli-başlı saf-çürük etmişdik. Fikrimcə, bizim işimiz oyunçularımızın biliklərini genişləndirməkdi. Mən bu planda fəal işləyirəm və inanıram ki, birgə işlədiyim hər bir futbolçu texniki və zehni cəhətdən inkişaf edib”.
Vinçentso İtalyano, “Bolonya”nın baş məşqçisi: “Gözlədiyimizdən daha yaxşı olan bir komandaya qarşı əlimizdən gələni etdik, Neres isə fantastik oyun göstərdi. Ferqyusonun qol vurmaq şansı vardı, amma hesab 2:0 olandan sonra bizim üçün hər şey bitdi. “Napoli” parlaq oyun sərgilədi, bütün gücümüzü meydanda qoyduq, lakin rəqibin səviyyəsinə heç cür çata bilmədik. Bu, təəssüf doğurur, ancaq məhz belə oyunlar komandanın inkişafına kömək edir”.
Digər xəbərlər
