“53-cü dəqiqədə Habibu Abdurəşid qırmızı vərəqə alaraq meydanı tərk etdi. Belədə meydanda iki legioner futbolçu qaldı. Legioner limitinin pozulması üçün bu say 3-ü keçməlidi. Biz də 61-ci dəqiqədə Matondo Lumbu Preddini meydana buraxdıq. Təbii ki, bundan əvvəl qaydalarla bağlı bilgi almaq üçün oyundakı baş hakim (Rəvan Həmzəzadə), hakim-inspektor (Munis Abdullayev) və AFFA nümayəndəsinə (Mübariz Hüseynov) müraciət etdik. Lakin onlar məlumatlı olmadıqlarını bildirdilər. Biz də hesabda geridə olduğumuzdan növbəti legionerə şans verdik. Görünür, qərarı yanlış anlamışıq. Sən demə, qırmızı vərəqə alan futbolçu da Əsasnamədə həmin limitə daxil olurmuş. Hər halda, səhvə yol verməsək, cəza almazdıq. Düşünürük ki, bizi bu barədə maarifləndirməliydilər. Düzdü, həmin oyunda onsuz da 1:3 hesabıyla uduzmuşduq. Lakin qalib gəlsək, indi çox acınacaqlı durum ortaya çıxacaqdı”.

“Əvvəla onu deyim ki, bu məsələ ilə bağlı Əsasnamədə konkret bəndlər mövcuddu. Belə ki, Əsasnamənin 3-cü maddəsinin 13.1 və 13.2 bəndlərində qeyd olunur ki, 1-ci liqada limit 8+3 prinsipinə uyğun müəyyənləşdirilir. Start heyətində 8 nəfər Azərbaycan vətəndaşı olan futbolçu yaş limiti olmadan iştirak edə bilər. Start heyətində maksimum 3 legioner futbolçu ola bilər. Komanda 11 futbolçudan az oyunçu ilə meydana çıxmaq məcburiyyətindədisə, bu zaman legioner futbolçu limiti pozulmamalıdı. Həmin maddənin 15-ci bəndində isə qeyd olunur ki, əvəzetmə zamanı limit pozulmamalıdı. 19-cu bəndin 6-cı alt bəndinə görə isə əvəzetmə zamanı futbolçulara tətbiq olunan limit pozularsa, bu zaman məsələ AFFA İntizam Komitəsində müzakirəyə çıxarılır. Onu da bildirək ki, Əsasnamə təkcə klublar üçün yox, həm də futbolda çalışanlar bütün şəxslərə aiddi. İstər AFFA nümayəndəsi olsun, istərsə də PFL əməkdaşları. Hər kəs Əsasnaməni maksimum dərəcədə bilməlidi. Təbii ki, maddələri əzbərləmək olmaz. Sadəcə, “Zaqatala”da da Əsasnaməni yaxşı şəkildə bilən şəxs olmalıdı. Baş məşqçinin bilməməsi başadüşüləndi. Əvvəlcə AFFA nümayəndəsindən yox, klub nümayəndələrindən soruşmaq vacibdi. Bu problem yaşanana qədər ətraflı məlumat olmalıdı. Belə hallara 1-ci liqada tez-tez rast gəlsək də, premyer-liqada nadir hallarda görünür. Çünki bu liqada Əsasnamədən xəbərdar olan, məhz bu məsələlərdə cavabdehlik daşıyan şəxslər var. Həm də etiraf edək ki, premyer-liqa klubları peşəkarlıq baxımından bir addım öndədi. AFFA nümayəndəsinin, hakim-inspektorun və ya başqasının Əsasnaməni bilməməsi isə öz problemidi. O başqa məsələ ki, əlbəttə, bilməlidilər. Yenə də klub daxilində Əsasnamədən məlumatı olan şəxslər olmalıdı. Yox, 1-ci liqa klubları bu yöndə maariflənmək, təlim almaq istəyirlərsə, biz həmişə hazırıq. PFL-in hansısa klubun müraciətinə “yox” dediyini xatırlamıram. Xüsusən bu yöndə təbliğata hazırıq”.