Norris də dəbilqəni imzaladı
“Maklaren”in pilotu Lando Norris demensiya ilə mübarizəyə həsr olunan xeyriyyə təşəbbüsünə qoşulub.
"Football-plus.az" xəbər verir ki, o, bütün hazırkı və sağ olan dünya çempionlarının avtoqraflarının yer aldığı əfsanəvi dəbilqəni imzalayan 21-ci çempion olub. Aksiya üçqat dünya çempionu, ser Ceki Stüart tərəfindən onun “Race Against Dementia” adlı xeyriyyə fondu çərçivəsində təşkil edilib.
Toplanan imzalarla unikal hala gələn dəbilqə xeyriyyə lotereyasının əsas mükafatı olacaq və əldə edilən vəsait demensiyanın profilaktikası və müalicəsi üzrə qabaqcıl elmi araşdırmalara yönəldiləcək. Lotereyanın qalibləri artıq 2025 mövsümündə Əbu-Dabi mərhələsinə səfər etmək imkanı qazanıb. İndi isə onlara dünya çempionlarının imzası olan həmin dəbilqə təqdim olunacaq.
Ceki Stüart fondun mətbuat açıqlamasında hisslərini də bölüşüb:
“Demensiya həyatımda qarşılaşdığım ən böyük sınaqdı, trassda yaşadıqlarımdan qat-qat ağırdı. Həyat yoldaşım Helenin bu xəstəliklə yaşaması məni müalicə uğrunda daha qətiyyətli edib”.
Əbu-Dabi mərhələsinin yekununa əsasən ümumi hesabda qalib gələrək “Formula-1” tarixinə 35-ci dünya çempionu kimi düşən Lando Norris dəbilqəyə imza atan son pilotdu. Təşəbbüsü dəstəkləyən digər çempionlar arasında Maks Ferstappen, Fernando Alonso, Mihael Şumaher, Alen Prost, Kimi Raykkonen, Censon Batton, Sebastyan Fettel, Niko Rosberq və Lüis Hemilton də yer alır.
Digər xəbərlər
