Deyəsən, “Qarabağ”ın dominantlığına son qoyacaq komanda tapılıb. Adı nədi? “Sabah”!

Aşağı yaş qruplarında “ağalıq edən” “Sabah”ın əsas komandası da əziyyətinin bəhrəsini görənə oxşayır. Artıq 15 turdan sonra turnir cədvəlinin lideri “Qarabağ” deyil. Ağdamlıları həm oyun planı, həm nəticə baxımından üstələyən “Sabah”dı. O sabah ki, Murad Musayev dönəmindən sonra, nəhayət, istədiyi baş məşqçini tapıb. Bir 2022/23 mövsümündə çempionluğa yaxın idilər, bir də indi. İndi daha sabit komanda, futbolçularını tanıyan baş məşqçi, zədələrə rəğmən, sona qədər vuruşan, rəqiblərini əzib keçən “Sabah” var.

Düzdü, “Sabah”ın tarixinə düşən baş məşqçi Vasili Berezutskidi. Axı kluba ilk titul qazandırıb - ölkə kubokunun qalibi olub. Amma Berezutski o Berezutskidi ki, heç-heçələrin sayına görə “rekord qırdı”. Yəni sabitlik yox idi. Bu mövsüm isə komanda 15 oyunun 10-da qələbə qazanıb, 4-də heç-heçə edib, yalnız 1 məğlubiyyəti var. Xallar daha çox mövsüm əvvəlində, Dambrauskasın hələ “heyəti otuzdurmağı” vaxt itirilib. Statistikaya baxın: “Sabah” sonuncu dəfə avqustda məğlubiyyətə uğrayıb, son 9 görüşün 7-də qələbə qazanıb.

Bəli, bu qoçun başı artıq digər qoçun - “Qarabağ”ın başı elə eyni qazanda qaynamayacaq. Belə görünür ki, “Qarabağ” artıq vaxtından əvvəl çempion ola bilməyəcək. Srağagünkü oyun yəqin bu komandanın azarkeşlərini qorxutdu. “Qarabağ”ın əli-qolu bağlanmışdı, heç nə edə bilmirdi. Deməli, “Qarabağ”ı taxtdan salmaq üçün rəqabət lazım imiş. Bəlkə ağdamlılar mövsümün sonunda taxtdan düşməyəcək, amma əminəm ki, rəqabət son ana qədər gedəcək. “Sabah”ın belə rəqabət şəraiti təklif etməsi isə hamıdan çox elə “Qarabağ”a sərf edir. Axı Qurban Qurbanov çempionatda tempin aşağı olmasından, Avropa səviyyəli klubların yoxluğundan şikayətlənir. Bu da sizə rəqabət! İndi var, özü də necə istəsəz!

Çempionatın aşağı-yuxarı yarısı geridə qalıb. “Sabah”da yeni transfer olacaq, olmayacaq - demək çətindi. Amma nə ehtiyac var ki transferə? Qapıçı desən, qapıçı, müdafiəçilər desən, müdafiəçilər. Yarımmüdafiəçilər istənilən səviyyədə. Hücum da həmçinin. Maluda kimi gələcəkdə nəhənglərin “elçi düşəcəyi” futbolçusu var. Dediyinə inansaq, minimum bir mövsüm də komandada qalmaq istəyir. Coy-Lens Mikelsin də “ayağı açılıb”, hər oyun qol vurur. Bu komanda mərkəz hücumçusu Pavol Şafrankonun, ötən mövsümün ən yaxşı iki oyunçusundan biri Cesse Sekidikanın, yarımmüdafiənin liderlərindən Zinədin Uld-Xaledin əməyindən məhrumdu. Onlar da zədədən qayıtsa...

Bir sözlə, “Sabah” çox iddialıdı, çox güclüdü. Hətta “Qarabağ”dan da!

MÜZƏFFƏR QULUZADƏ