Mayın 31-də ölkə kubokunun finalında “Qarabağ”la “Sabah” qarşılaşacaq.

Çempionun daha bir titul qazanmaq şansı yüksək dəyərləndirilsə də, son mövsümdə bu komandalar arasında keçirilən çempionat oyunlarının statistikası ortaya maraqlı mənzərə qoyur.

İlk oyun Misli premyer-liqasının 8-ci turunda baş tutub. Həmin görüşdə “Qarabağ” evdə “Sabah” üzərində 3:2 hesablı qələbə qazanıb. O vaxt “bayquşlar”ı hələ Krunoslav Renduliç çalışdırırdı. Sonrakı üç oyunda isə qalib müəyyənləşməyib.

Premyer-liqanın 16-cı, 24-cü və 32-ci turları çərçivəsində keçirilən görüşlər 1:1 hesabı ilə başa çatıb. Həmin vaxt “Sabah” artıq Vasili Berezutskinin rəhbərliyi altındaydı. Onun dövründə komanda “Qarabağ”a uduzmayıb.

Maraqlı bir məqam da var ki, son mövsümdə bu iki komanda arasında keçirilən bütün oyunlarda hesabı “Qarabağ” açıb. Amma hesabı açmaq hələ qələbə qazanmaq deyil.

İndi isə qarşıda mövsümün ən vacib matçı var. Görək kuboku başı üzərinə kim qaldıracaq?

ƏSƏD SEYİDOV