“Qarabağ” 15-ci turda evdə “Araz-Naxçıvan”ı darmadağın etdi – 5:1.

“Football-plus.az” xəbər verir ki, ağdamlıların baş məşqçisi Qurban Qurbanov oyundan sonra jurnalistlər önünə çıxıb.

- Futbolçularımı təbrik edirəm. Çox vacib qələbə idi. Vacib olan o idi ki, oyunçular intizamlı oynasınlar. Sona yaxın bir-iki boşluq oldu, ümumən çox diqqətli və intizamlı oyun göstərdilər. Baxmayaraq ki, qarşımızda topla yaxşı davranan komanda var idi. Yaxşı hücumlarımız oldu, yaxşı qollar vurduq. Rəqibə və komandamıza uğurlar arzulayıram. Azarkeşlərimizə də təşəkkür edirəm.

- Yankoviçin yoxluğunda həmin mövqeədə Montiel, daha sonra Addai oynadı. Yankoviç hazır deyildi?
- Yankoviçə istirahət vermişdik. Xeyli oyunçunu əsas heyətdə buraxmamışdıq. Çünki əvvəlki matç gərgin və sürətli keçmişdi. Son vaxtların ən sürətli keçən oyunu idi. Hər oyunçunun göstəriciləri yüksək idi.

- "Sabah" - "Qarabağ" matçından gözləntiniz nədi?
- Həqiqətən də bugünkü nəticələri "Sabah"ın oyununa görədi. Oyundan-oyuna daha təhlükəli "Sabah" gəlir, yaxşı kollektiv formalaşıb. Yaxşı oyun intizamları var. Çox ciddi rəqibə qarşı oynayırıq. Sadəcə, bu gün və sabah oyunçulara istirahət verəcəyik. Futbolçularda istər-istəməz yorğunluq artır. Düzü, rəqibi yaxından təhlil etməmişik hələ. Amma oyunlarına baxmışıq, "Neftçi" və "Turan Tovuz" ilə oyunlarına baxmışıq.

- Kadi sıradan çıxandan sonra onun mövqeyində oynayan futbolçularda həmin performansı görə bilirsiz?
- Hər oyunçunun uyğun mövqeyi var. Kadinin sıradan çıxması başqa mövqelərə də təsirsiz ötüşmür. Çünki fərqli mövqedən olan oyunçunu orda oynayanda digər sıxıntılarımz da olur. Bu da qaçılmazdı. Dünya futbolunda da var. Amma futbolçularım sağ olsunlar, nəticə üçün əlindən gələni edir. Hər kollektiv bir oyunçunun üzərində qurulmur. Kadı pleymeyker zonasında oynayır, onu bəzən dayaq yarımmüdafiəçisi kimi də oynatmışıq. Rəqibdən də asılıdı. Kadi kimi qabiliyyətli, təcrübəli oyunçuların meydanda olması kollektiv, oyunumuzun qurulması üçün əlavə üstünlükdü. Çox istəyərəm ki, oyunçularım həmişə sağlam olsunlar.

- Qış fasiləsinə iki oyun qalıb. Futbolçular mövsümün əvvəlində güman etdiyinizdən daha çoxunu verə biliblər meydançada, yoxsa necə? Futbolçuların göstəriciləri necədi?
- Gözləntim olan futbolçulardan gözlədiyimi ala bilmişəm. Daha çox gözlədiyimdən elələri olub ki, ala bilməmişəm. Amma burda deməyim düzgün olmaz. Özləri bunu bilirlər və özləri də doğru-düzgün qəbul ediblər.

- "Sabah”la matçda mümkün məğlubiyyət çempionluq yarışına təsir edəcək?
- Hələ qarşıda xeyli oyun var. Mövsüm başlayanda neçənci yerdə idik, xeyli sonra pillə-pillə qalxmağa başladıq. “Sabah” da belə idi. İndi daha yaxşı yerlərə yüksəliblər. Düzdü, vacib oyundu. Qalib gəlsək, o demək deyil ki, mövsümün sonunda çempion olacağıq. Həmin oyunun nəticəsindən asılı olmayaraq, mübarizə davam edir. "Sabah" da bütün fikrini çempionata yönəldib.