“Neftçi” Samir Abasovla vidalaşandan sonra “sükan arxasında” hələ ki akademiyanın əlaqələndiricisi Sənan Qurbanov dayanır.

Onun ilk sınağı “Turan Tovuz”a qarşı oldu. Keyfiyyətsiz meydança, sönük oyun və sonda hərəyə 1 xal. Digər matç isə daha vacib “Zirə” səfəri idi. Kubok oyununda 90 dəqiqə ərzində qaydalar çərçivəsində qapılara yol tapılmadı, 116-cı dəqiqədə “Zirə” hesabı açdı.

Əslində bu 30 dəqiqədə “Neftçi” qol vurmağa daha çox can atmalıydı. Çünki “Zirə”nin qapısında penalti qaytarmaq üzrə “ixtisaslaşan” Tyaqo Silva var idi. Lakin “Neftçi” müdafiəyə oturdu, oyundan sonra da futbolçular dedi ki, matçı penalti seriyasına aparmaq istəyirdik.

Sənan Qurbanov bu iki matçda nə etdi, komandada nəyi dəyişə bildi? Hər iki oyundan sonra mətbuat konfransında ona belə sual verildi. Cavabında “komandada qlobal dəyişiklik etmək olmazdı” dedi. Düzdü, heyətdə, az da olsa, dəyişiklik var idi. Oyun planı baxımından isə tərəqqi yox idi.

Niyə dəyişiklik etmək olmazdı? Dəyişiklik olmayan halına görə Samir Abasov hazırda “Neftçi”nin baş məşqçisi deyil. Elə ona görə də nəyisə dəyişmək lazım idi axı. Sənan Qurbanovun kubokun ikiqat kubok qalibi olması müəyyən ümid verirdi. Lakin göründü ki, 2 yox e, 49 titul qazanan Aleks Ferqyuson da gəlsə, xeyri yoxdu. Daha doğrusu, bu “Neftçi”yə xeyri yoxdu.

Sənan Qurbanov heç bir dəyişiklik edə bilmədiyindən onun dövründə “Neftçi” camiəsinə ilk “gecəniz xeyrə!” mesajını “Zirə”nin futbolçusu Junior Martins verdi...

MÜZƏFFƏR QULUZADƏ