"Qarabağ"ın qapıçısı Mateus Koxalskinin Çempionlar Liqasında imza atdığı uğurlardan xəbərdarsız.

Polşalı xüsusən liqa mərhələsinin 5-ci turunda "Napoli"yə qarşı matçda etdiyi 8 seyvlə nəinki yerli futbol ictimaiyyətinin böyük məhəbbətini qazandı, hətta dünya futbolunun ən çox müzakirə olunan qapıçılardan birinə çevrildi. Təsadüfi deyil ki, həmin qarşılaşmadan sonra qolkiperin bir çox ölkədən təklif aldığı haqda iddialar ortaya atıldı. Bu sırada adı məlum olan klublar hələ ki, "Ayntraxt" (Almaniya) və "Napoli"di (İtaliya). Niyə də yox? Axı Koxalski liqa mərhələsindəki seyvlərinin sayını 17-ə çatdırıb. Bu nəticə ilə o, yarışda ən çox seyv qapıçıları siyahısında 11-ci yerdədi.

İş ondadı ki, Neapol təmsilçisi "əlcək sahibi"ni qarşıdan gələn qış "transfer pəncərəsi"ndə heyətinə qatmağı planlaşdırır. Axı "Qarabağ" yanvarın 21-də "Ayntraxt"la, 28-də "Liverpul"la (İngiltərə) qarşılaşacaq. Həmin qarşılaşmaların "köhlən atlar"ın liqa mərhələsini ilk "24-lük"də başa vurmaq arzusuyla əlaqədar əhəmiyyətini nəzərə alsaq, Koxalskinin gedişi qətiyyən arzuolunan deyil.

Ümid edək ki, həm qapıçı, həm də klub rəhbərliyi təklifləri dəyəyrləndirərkən bu məqamları nəzərə alacaq. Xüsusən Koxalski baş məşqçi Qurban Qurbanovu yarı yolda qoymayacaq.

KƏNAN BAHADIR