Türkiyə çempionatının 14-cü turunda şənbə günü keçirilən ''Çaykur Rizəspor'' - ''Kayserispor'' matçının ardından istefa xəbəri gəldiyini bildirmişdik.

"Football-plus.az" xəbər verir ki, Rizəlilərin çalışdırıcısı İlhan Palut minimal hesablı məğlubiyyətdən sonra öz istəyilə istefa vermişdi.

Bu arada ''Çaykur Rizəspor''un yeni baş məşqçisi demək olar, bəllidi. Türkiyə mətbuatının yazdığına inansaq, rəhbərlik Abdulla Avcı ilə danışıqlar apararaq onunla ilkin anlaşma əldə edib. Avcının Rizəyə gələcəyi və rəsmi müqaviləyə imza atacağı gözlənilir. 62 yaşlı Avcı 15 aya yaxındı, işsiz idi.

Sözsüz ki, onun 2022-ci ildə ''Trabzonspor''la qazandığı çempionluq uzun illər unudulmayacaq. Bu çempionluqdan sonra Avcı uğursuz nəticələrə görə Trabzondan ayrılmış, bir müddət sonra geri dönmüş və ikinci dönəmində də uğursuzluğa düçar olmuşdu.

Daha öncə Türkiyə yığmasını da çalışdırmış Avcı 2024-ün avqustundan bu yana heç bir klubda işləmirdi. Onun ''Çaykur Rizəspor''la ilyarımlıq müqavilə imzalayacağı gözlənilir. Hazırda 12-ci pillədə qərarlaşan Rizə klubu dekabrın 2-də ölkə kubokunun 4-cü mərhələsində öz meydanında ''Pendikspor''la qarşılaşacaq. Növbəti turda isə rizəliləri Konya səfəri gözləyir.