Noyabrın 23-27-si aralığında keçirilən oyunlarla Argentina çempionatının Klausura (bağlanış) mərhələsində 1/8 final arxada qaldı.

"Football-plus.az" xəbər verir ki, bu mərhələnin diqqəti daha çox cəlb edən nəticələri “Rosario Sentral” ilə “River Pleyt”in mübarizəni erkən dayandırması oldu.

Xatırldaq ki, A və B qrupunda hərəyə 15 komanda birdövrəli sistemlə mübarizə aparıb. A qrupunda ilk 8 yeri tutan “Boka Xuniors”, “Union”, “Rasinq”, “Sentral Kordoba”, “Arxentinos Xuniors”, “Barrakas Sentral”, “Tiqre” və “Estudiantes” 1/8 finala çıxıb. B qrupunda azarkeşlərini sevindirənlər isə “Rosario Sentral”, “Lanus”, “Deportivo Riestra”, “Veles Sarsfild”, “San Lorenso”, “River Pleyt”, “Ximnasiya” və “Talyeres de Kordoba” idi. Qrupu lider kimi başa vuran “Rosario Sentral”ın sonuncu turda “İndependyente”yə minimal hesabla uduzması ilə Ariel Olanın komandasının məğlubiyyətsiz seriyası qırılmışdı. Başqa sözlə, qrup turnirində uduzmayan iştirakçı olmadı. Ölkə nəhənglərindən “River Pleyt”in qrupu 6-cı yerdə başa vurmasını da qeyd edək. Vurğulanası digər fakt isə “Platense”nin Klausuranı fiasko ilə başa vurması idi. İyunun 1-də Aperturanın (açılış) çempionu olan komanda bu dəfə B qrupunda sonuncu yeri tutaraq pley-offa çıxa bilməyib! Qeyd edək ki, 1/8 finalın cütləri komandaların qruplardakı mövqeyinə əsasən müəyyənəşib. Məsələn, A qrupunda 1-ci yeri tutan B qrupunda 8-ci, A qrupunun ikincisi digər qrupun yeddincisi ilə qarşılaşır. Bu qayda ilə 1/8 final oyunlarında cütlər püşk atılmadan formalaşıb.

Bu mərhələdə əksər favoritlər qalib gələrək 1/4 finala adladı. Əlbəttə, B qrupunda lider olan “Rosario Sentral”ın digər qrupda 8-ci yeri tutan “Estudiantes”ə öz meydanında uduzması (0:1) ilk növbədə vurğulanmalıdı. Ölkə nəhəngi “River Pleyt” də növbəti mərhələdə görünməyəcək. Marselo Qalyardonun komandası “Rasinq”ə 2:3 hesabıyla uduzdu. Bu da var ki, “River” B qrupunu 6-cı yerdə başa vurduğu üçün bu səbəbdən ilk pley-off oyununu səfərdə keçirməyə məcbur idi. Avelyanedada baş tutan matçda ev sahiblərinin qələbə qolunu son dəqiqələrdə vurduğunu da qeyd edək.

Beləliklə, noyabrın 29-30-da və dekabrın 1-də keçiriləcək 1/4 final üçün cütlər belə formalaşdı: Sentral Kordoba - Estudiantes, Boka Xuniors - Arxentinos Xuniors, Barrakas Sentral - Ximnasiya, Rasinq - Tiqre.

1/8 final
Veles Sarsfild - Arxentinos Xuniors 0:2
E.Lopes, 58; 62.

Sentral Kordoba - San Lorenso 2:1
Varaldo, 67-p. Florentin, 90+1 – Qulyi, 45+1.

Rosario Sentral – Estudiantes 0:1
Setre, 31.

Boka Xuniors - Talyeres de Kordoba 2:0
Merentyel, 28; 46.

Deportivo Riestra - Barrakas Sentral 0:1, əlavə vaxtda
Blandi, 115.

Rasinq - River Pleyt 3:2
Solari, 4. Martines Kuarta, 73-öz qapısına. Martirena, 90+3 – Subiabre, 62. Kintero, 64.

Union – Ximnasiya 1:2
Tarraqona, 53 – Panaro, 18. E.Martines, 24.

Lanus – Tiqre 0:1
D.Romero, 48.

Bombardirlər: R.Martines (Platense) - 8, Di Mariya (Rosario Sentral), Kastilyo (Lanus), M.Torres (Ximnasiya) - 7, X.Errera (Deportivo Riestra) - 6.