Türkiyədə ilk mövsümünü keçirməsinə baxmayaraq ''Beşiktaş''ın liderlərindən olan və komandanı arxasınca daşıyan Rafa Silva yavaş-yavaş rekord göstəriciyə yaxınlaşır.

''Football-plus.az'' xəbər verir ki, portuqaliyalı ulduz bu mövsüm ''ağ-qaralar''ın heyətində 41 rəsmi oyuna çıxaraq 25 qolun vurulmasında yaxından iştirak edib. Onun aktivində 14 qol, 11 məhsuldar ötürmə var. 31 yaşlı futbolçu mövsümün qalan hissəsində rekordu yeniləmək üçün daha 10 qolda yaxından iştirak etməlidi. Bunu bacaracağı təqdirdə o, ''Beşiktaş'' tarixində bir mövsümdə ən çox qolun vurulmasında iştirak edən əcnəbi futbolçuya çevriləcək! Bu rekord Mario Qomesə məxsusdu. Almaniyalı futbolçu ''Qartal''da cəmi 1 mövsüm keçirsə də, klub tarixində iz buraxmağı bacarıb. 2015/16-da onun mükəmməl performansı sayəsində ''Beşiktaş'' 7 illik çempionluq həsrətinə son qoymuşdu. Məhz həmin mövsüm Qomes 41 rəsmi oyunda 28 qol, 6 məhsuldar ötürməlik performansla 34 qolun vurulmasında yaxından iştirak edib və rekord müəyyənləşdirib.

Amma ''Beşiktaş'' artıq həm avrokuboklarda, həm də ölkə kubokunda mübarizəni dayandırdığından komanda mövsümün sonuna qədər yalnız Türkiyə çempionatında 8 oyun keçirəcək. Yəni Rafa Silvanın ixtiyarında rekordu yeniləyə bilmək üçün cəmi 8 oyun qalıb.