DÇ-2026-ya vəsiqə qazanan ölkələr bir-bir bəlli olur. Hədəfə çatan ölkələrdən biri də Haitidi.

"Football-plus.az" xəbər verir ki, KONKAKAKAF zonası üzrə seçmə mərhələnin final turunun C qrupundakı son matçda Nikaraquanı 2:0 məğlub edən Haiti son 51 ildə ilk dəfə, tarixində isə ikinci dəfə mundilda oynamağa haqq qazandı.

Bu komanda daha öncə yalnız DÇ-1974-də iştirak etmişdi. Bu ilin martında paytaxtımızda keçirilən yoxlama matçında yığmamızı 3:0 məğlub edən Haitinin uğurunun çox maraqlı və hətta heyrət doğuran tərəfi var.

Bu komandanın çalışdırıcısı Sebastyan Minye indiyə qədər heç vaxt Haitiyə ayaq basmayıb. 52 yaşlı mütəxəssis faktiki olaraq bu vəzifəyə təyin olunduğu vaxtdan, yəni 2024-ün martından bu yana komandanı onlayn çalışdırır! Məsələ burasındadı ki, ölkədə 2021-ci ildə prezident Jovenel Moizin öldürülməsi ilə başlayan vətəndaş müharibəsi davam edir.

Silahlı qruplaşmalar paytaxtda bir çox önəmli obyektləri, eləcə də mərkəzi stadionu ələ keçiriblər. Bu üzdən Haiti uzun müddətdi ev oyunlarını başqa stadionlarda keçirir. Turistlərə qətiyyətli şəkildə Haitiyə yollanmamaq məsləhət görülür. Baş məşqçi Sebastyan Minye də bu üzdən ölkəyə daxil ola bilmir. Bu şərtlər altında Haitinin mundiala vəsiqə qazanması həqiqətən də möcüzədi.