Ötən ay Bakıda ajoitajla qarşılanan “Neftçi”nin hücumçusu Vensan Abubakar növbəti dünya çempionatında olmayacaq. Onun da 48 dəqiqə meydanda olduğu oyunda Kamerun Konqoya 90+1-ci dəqiqədə buraxdığı qolla 0:1 hesabıyla uduzaraq mundiala vəsiqə qazana bilmədi.

Konqo ilə oyunda Abubakar heç nə edə bilmədi. Bundan sonra, yəqin ki, ancaq “Neftçi”yə köklənər. Öz üzərində işləyər, daha yaxşı olmağa çalışar. Yəqin ki, “Qarabağ”la oyundan sonra Azərbaycan çempionatının da səviyyəsini hiss etdi. 3-cü zonada Bikalyo, irəlidə isə Medina Abubakara “göz verdi, işıq vermədi”. O da hiss etdi ki, hazırda belə oyunlarda həlledici rolda ola biləcək səviyyədə futbolçu deyil. Daha doğrusu, indiki durumu buna imkan vermir.

Artıq bütün gücünü “Neftçi” üçün ortaya qoymalıdı. 3-cü dəfə DÇ-də oynamayağı da aydındı. 2030-da 38 yaşı olacaq. Heç 33 yaşında millisini çətin sınaqdan çıxara bilmir, 5 il sonra nə edəcək? Yəqin ki, karyerasını bitirəcək. Kimə gəldi milyonlar xərcləyən ərəblərə də lazım olmayacaq.

Hey, Abubakar! Özünü dön, sən indi Kameruna yox, “Neftçi”yə lazımsan!

MÜZƏFFƏR QULUZADƏ