“Azərbaycanda voleybol ölüb, basdıran lazımdı” – azarkeş coşdu

Ölkəmizin qadınlardan ibarət voleybol yığması İslamiadada finala çıxsa da, avrokuboklarda çıxış edən klubların hədsiz uğursuz nəticələr göstərməsi heç kimə sirr deyil.

Məsələn, kişilərdən ibarət “Xilasedici” dünən Çağırış kubokunun 1/32 final mərhələsinin ilk oyununda səfərdə “Styaua” ilə qarşılaşdı. Oyun Rumıniya klubunun aşkar qələbəsi ilə başa çatdı – 3:0 (25:21, 25:20, 25:20).

Düzdü, noyabrın 20-də Bakıda bu komandalar arasında cavab oyunu da keçiriləcək. Ancaq “Xilasedici”nin 1/16 finala vəsiqə qazanacağına inanan yoxdu. Azərbaycan Voleybol Federasiyasının “feysbuk” hesabında bu oyunun nəticəsi ilə bağlı paylaşımın altına yazılan rəylərdən də inamsızlığı sezmək mümkündü.

Nicat Quliyev belə yazıb: “Azərbaycanda voleybol ölüb, basdıran lazımdı, başqa heç nə”.

ORXAN