ABŞ çempionatının yüksək liqasında məvacib ödənişi ilə bağlı növbəti məlumat yayılıb. MLS-in cari mövsümündə oyunçularına ən çox məvacib ödəyən klub “İnter Mayami”di.

"Football-plus.az" xəbər verir ki, Mayami klubu il ərzində bu planda 48,97 milyon dollar xərcə düşür. MLS-də illik maaş ödənişi göstəricisinə əsasən növbəti yerləri “Los Anceles” (30,1 milyon dollar) və “Atlanta Yunayted” (28,48 milyon dollar) tutur. Bu planda sonuncu yerdə isə “Monreal İmpekt”di (12,92 milyon dollar). Qeyd edək ki, MLS-in cari mövsümündə Qərb və Şərq konfranslarının hər birində 15, ümumilikdə 30 komanda çıxış edir.

ABŞ çempionatında ən yüksək məvacib alan oyunçulara gəlincə, bu siyahıya yenə də Lionel Messi başçılıq edir. “İnter Mayami”nin 38 yaşlı argentinalı hücumçusu ilə 20,4 milyon dollar alır. Növbəti iki sırada yayda “Tottenhem”i tərk edərək “Los Anceles”ə keçən koreyalı yarımmüdafiəçi Son Hın Min (11,2 milyon dollar) ilə Messinin ispaniyalı oyundaşı Serxi Busketsdi (8,8 milyon dollar). MLS-də ən çox maaş alan futbolçuların ilk “5-liy”inə “Atlanta Yunayted”in paraqvaylı yarımmüdafiəçisi Migel Almiron (6,1 milyon dollar) və “San Dieqo”nun meksikalı hücumçusu İrvinq Losano (6 milyon dollar) da daxildi.