Çempionlar Liqasında əsas mərhələnin 4-cü turunun ilk oyun günü arxada qaldı.

"Football-plus.az" xəbər verir ki, bir sıra maraqlı göstəricilər qeydə alındı.

Böyük səbirsizliklə gözlənilən matçda ''Bavariya'' səfərdə PSJ-ni 2:1 məğlub edərək bu mövsümkü 16-cı rəsmi oyunda da qalib gəldi və ''böyük beşlik''də özünə məxsus olan rekordu bir qədər də yaxşılaşdırdı.

Bu qarşılaşmaya Luis Dias damğa vurdu. Kolumbiyalı ulduz həm iki qol vuraraq qəhrəmana çevrildi, həm də ilk yarının sonlarında Hakimiyə qarşı kobud oynayaraq birbaşa qırmızı vərəqə aldı. Dias ÇL tarixində bir qarşılaşmada həm iki qol vuran, həm də meydandan qovulan cəmi ikinci futbolçu oldu! Daha öncə bunu 2021-ci ildə ''Liverpul'' ilə oyunda ''Atletiko''lu Antuan Qrizmann yaşamışdı.

Maraqlıdı ki, ''Tottenhem''li Brennan Conson da Diasın yolu ilə getdi. ''Kopenhagen''lə matçda Conson həm qol vurdu, həm də qırmızı vərəqə aldı. Buna qədər ÇL tarixində bir oyunda həm qol vuran, həm də qırmızı vərəqə alan britaniyalı futbolçu olmamışdı. ''Slaviya''nı 3:0 məğlub edən ''Arsenal'' isə ardıcıl 8-ci rəsmi oyunda qol buraxmadan qalib gəldi. Bu, İngiltərə çempionatında çıxış edən bir klubu üçün rekordun təkrarlanması deməkdi.

İngiltərə elitasında çıxış edən klublardan daha öncə ''Preston'' (1889) və ''Liverpul''un (1920) bu cür seriyaları olub.