“Qarabağ” sabah Çempionlar Liqasının liqa mərhələsində 4-cü oyununa çıxacaq.

“Football-plus.az” xəbər verir ki, bu gün Tofiq Bəhramov adına stadionda mətbuat konfransı keçirilib. Ağdamlıların baş məşqçisi Qurban Qurbanov jurnalistlərin suallarını cavablayıb.

- Bizi çox maraqlı oyun gözləyir. Tarixi, güclü komandaya qarşı oynayacayıq. Belə futbolçuları görmək azarkeşlər üçün stimuldu. Hazırlaşmışıq. Pis də hazırlaşmamışıq. Futbolçularıma inanıram. İnanıram ki, azarkeşlər oyundan razı qalacaq.

- “Çelsi” Bakıda məşqə çıxmadı. Bu “Qarabağ” üçün az da olsa, üstünlük ola bilər?
- İnanmıram ki, belə böyük klublara təsir etsin. Çox belə halla üzləşiblər. Problem yaratmamalıdı. Bizdə də belə hal yaşanıb. Bəzi səfərlərimiz olub ki, buna bənzər proqramla getmişik. Saat fərqi çoxdu. Bu onların işinə ciddi yanaşdığını göstərir. Bunu nəzərə alıb, rahatlıq tapmamalıyıq.

- Rəqibin zədəli futbolçuları da var…
- Belə komandalarda bu təsir etmir. Heyətləri çox genişdi. Xırda detalları axtarmalı deyilik. Onların oyun sisteminə uyğunlaşmalıyıq. Elə olub ki, digər oyunçular oynayanda daha fəal olublar.

- BBC-dən gəlmişəm. “Çelsi”yə qalib gəlsəz, bu ən böyük qələbəniz sayıla bilər?
- Xoş gəlmisiz. Belə böyük komanda üzərində qələbə çox önəmlidi. Kiçik futbol ölkəsi kimi tanınırıq. Əlavə stimul və inamdı. İngiltərə komandalarına qarşı qələbəmiz, heç-heçəmiz yoxdu. İngiltərə premyer-liqası başqa səviyyədi. Ən güclü liqadı. Belə komandalara məğlub olsaq da, uduşumuz var. İnamlı mübarizə aparmağı bacarmalıyıq, təslim olmamalıyıq. Onların Bakıya gəlməsi, bizə qarşı oynaması bizim üçün uduşdu.

- 2018-ci illə müqayisədə nə qədər təkmilləşmisiz?
- O vaxt klublar arasında fərq çox idi. İndi daha çoxdu. Əvvəllər zəif cəhətimiz çox, təcrübəmiz az idi. Nə qədər təcrübəli olsaq da, “Çelsi” daha çox inkişaf edib. PSJ-nin qapısına 3 top vurublar. Yaxşı oyun göstərməyə çalışacağıq.

- “Çelsi”də zədəli futbolçular var. Onların olmaması “Qarabağ”a yaxşı mənada təsir edə bilər?- Çox vaxt rotasiyaya gedirlər. Amma oyun üslubu sabit qalır. Bu komandaların heyət dəyişməsi fərq etmir. Öz bildiyimizi etməyə çalışacağıq. Futbolçularımız oyundan zövq alıb, yaxşı mübarizə aparmalıdı.

- Musa Qurbanlının durumu nə yerdədi?
- Üç gündü fərqli məşqlərə başlayıb. Milli fasilədən sonra sıraya dönəcək.

- “Qarabağ” “24-lüy”ə düşsə, yanvarda transfer olacaq?
- Bu barədə çox düşünmək istəmirik. Hücumçu axtarışındaydıq. Bir neçə mövqeyə də futbolçu axtarırıq. Transfet üçün nəticəni gözləmirik.

- “Çelsi” “beşli” müdafiə oynayan komandalara qarşı oynayanda axsayır. Sabah “Çelsi”ni belə sürpriz gözləyir?
- Belə komandaların qrafikinə görə yorğunluğu olur. Hazırda “beşli” müdafiəni bəyənmirəm. Baxmayaraq ki, futbol indi bunu tələb edir. Biz uğuru sistemimizə görə qazanmışıq. Bu sxemlə oynayıb, dominant oynayam komandalar var. Oyunun gedişində taktiki dəyişikliklər ola bilər.

MÜZƏFFƏR QULUZADƏ