"Qarabağ"ın baş məşqçisi Qurban Qurbanov UEFA Çempionlar Liqasının 2-ci təsnifat mərhələsinin ilk oyununda keçiriləcək "Şelburn"a qarşı matçdan danışıb.

"Football-plus.az" xəbər verir ki, o, matçdan öncə keçirilən mətbuat konfransında sualları cavablayıb.

- Çox yaxşı komandaya qarşı oynayırıq. Bu komanda haqqında ancaq xoş sözlər demək olar. Çünki bu komandanın oyununu həm də canlı izlədim. Özünəxas oyun üslubu və bunu düzgün yerinə yetirən futbolçuları var. Çox intizamlı və fiziki cəhətdən yaxşı olan oyunçuları var. Rəqibin oyun təcrübəsi bizdən biraz yuxarıdı. Çünki onlar həm çempionatlarında oyunlarını davam etdirirlər, həm də artıq Çempionlar Liqasının təsnifat mərhələsində 2 oyun keçiriblər. Ona görə idman formasına baxanda, böyük ehtimalla, bizdən daha yaxşı durumdadılar. Hər halda, rəqibi yaxından tanımağa çalışmışıq. Mütləq çalışmalıyıq ki, səhvsiz oynayaq. İnanıram ki, ən azından azarkeşlər üçün maraqlı oyun olacaq. Baxmayaraq ki, azarkeşlərin sayı burda azdı, amma sanki 10-15 minlik stadionda oynayırsan. Çünki onların azarkeşlərinin sayı az olsa da, istəklərini Belfastda canlı gördüm.

- Təhlükəni daha çox nədən gözləyirsiniz?
- Çox istəklidilər. Həmçinin öz oyun sistemlərini düzgün yerinə yetirirlər: həm sürətli əks-hücumları, həm də mövqelərində hücuma yaxşı hazırlaşan komandadı. Standart vəziyyətlərdə də təhlükəlidilər. Ümumi olaraq hər elementdə təhlükəlidilər. Buna görə də dedim ki, çalışmalıyıq, az səhv edək. Öz bacarığını üzə çıxaran və bir-birini yaxşı tanıyan kollektivdi.

- "Qarabağ" Avropada böyük təcrübəyə malikdi, uzun illərdi ardıcıl olaraq qrup mərhələsində iştirak edir. Bunun sirri nədi?
- Sirr deməzdim, sadəcə klub öz işinə çox ciddi yanaşır. Rəhbərlik səviyyəsində elə iş qurulub ki, hər il ən azından uğur qorunub saxlanılmalıdı deyə bir prinsip var. Həmişə çalışmışıq ki, istəkli kollektivimiz olsun. Bəzi dəyişikliklərə baxmayaraq, bunu qoruya bilmişik. Əfsuslar olsun ki, problemlər hər il olur. Bəzən düşündüyümüz nəticələri əldə edə bilmirik. Amma bəli, 11 il qruplarda oynamağı böyük uğur sayırıq. Amma bəzən düşündüyün kimi alınmır.

- Bir neçə il əvvəl İrlandiyada "Dandolk"la qarşılaşma var idi. Həmin matçda heç-heçə qeydə alınımışdı və Bakıda qələbə qazanaraq mərhələni keçmişdiniz. Sabah da heç-heçə qeydə alınsa, buna necə yanaşarsınız?
- Ola bilər ki, minimal hesablı məğlubiyyət də bizə sərf etsin. Çünki ikinci oyuna daha yaxşı hazırlaşmaq imkanımız olacaq. Amma dediyim kimi, bizi çox istəkli və intizamlı komandaya qarşı oyun gözləyir. Ona görə yox ki, rəqibə tərif verirəm. Onlar bunu haqq edirlər. Bir-birilərini tamamlayan futbolçuları var. Əsas da öz stadionlarında, azarkeşləri qarşısında çox alışıb yanan kollektivdi. Ona görə bu stadionda oynamaq heç də asan deyil. Bu gün bu kollektiv istənilən komandaya qarşı oynamağa bacardığını göstərir. Onlar həm fiziki, həm texniki, həm də sistem baxımından keyfiyyətlidilər. Ona görə də oyunda hər nəticə ola bilər. Əvvəlcədən bir şey deyə bilmərik. Ola bilər, bizə bərabərlik, ya qalibiyyət sərf etsin. Ya da minimal hesablı məğlubiyyət. Hər halda qalib cavab oyununda bilinəcək.