La Liqanın 11-ci turunda ''Real'' doğma ''Santyaqo Bernabeu''da ''Valensiya''nı 4:0 hesabı ilə darmadağın etdi.

"Football-plus.az" xəbər verir ki, oyuna start heyətində başlayan Arda Gülər Kilian Mbappenin hesabı 2:0 edərkən vurduğu qolda aktivinə məhsuldar ötürmə yazdı.

Arda Madrid nəhənginin heyətində 75-ci rəsmi oyununu keçirdi. Bunun sayəsində ''Fənərbaxça''nın büdcəsinə daha 2 milyon avro əlavə olunacaq. Gənc türkiyəli ulduz 2023-cü ildə İstanbul nəhəngindən ''Real''a 20 milyon avroya transfer olunmuşdu. Müqavilədəki bonus maddəsinə əsasən Ardanın meydana çıxdığı hər 25-ci rəsmi oyunda ''Real'' ''Fənər''ə 2 milyon avro ödəyir. Yəni ''kral klubu'' indiyə qədər bu maddəyə əsasən ''sarı-lacivərdlilər''ə ümumilikdə 6 milyon avro bonus ödəyib. İki klub arasındakı anlaşmaya əsasən bonusun maksimum həcmi 10 milyon avro təşkil edir.


Xabi Alonsonun dönəmində ''Real''ın əsas heyət üzvünə çevrilən Gülər mövsümə kifayət qədər inamlı başlayıb. Klublararası Dünya Çempionatını da nəzərə alsaq, bu mövsüm 20 rəsmi oyunda artıq onun aktivində 4 qol və 8 məhsuldar ötürmə var.

Ümumilikdə isə 20 yaşlı yarımmüdafiəçi Madrid karyerasında iştirak etdiyi 75 qarşılaşmada aktivinə 15 qol, 17 məhsuldar ötürmə yazıb.