''Real''da heç cür əsas heyətə düşə bilməyən və gününü ehtiyat oyunçular skamyasında keçirən Arda Gülər ilə bağlı çoxsaylı transfer xəbərlərinə daha biri əlavə olunub.

Böyük potensiala malik olan 20 yaşlı yarımmüdafiəçi ''Real''da az oynamaq şansı qazanmasına baxmayaraq ciddi təkliflər almaqda davam edir. Türkiyə yığmasının ulduzu indi də ''Liverpul''un maraq dairəsinə düşüb.

İspaniya mətbuatının iddiasına görə ''qırmızılar'' Ardaya görə 60 milyon avro ödəməyə hazırdı. Hadisələrin bu cür axarı ''Fənərbaxça''nı da bir xeyli sevindirər. Çünki ''Fənərbaxça'' ilə ''Real'' arasındakı anlaşmaya görə Gülərin satışından əldə olunacaq məbləğin 20 faizi İstanbul nəhənginə çatacaq. Yəni Arda 60 milyon avroya satılsa, ''Fənər'' 12 milyon avro irəli düşəcək. Amma ''Real''ın ''Liverpul''un yarımmüdafiəçisi Aleksis Makallisterə maraq göstərdiyi məlum olduqdan sonra ortaya yeni iddia atılıb. Belə ki, ''qırmızılar'' argentinalı ilə türkiyəlinin başabaş dəyişdirilməsini teklif edə bilərlər.

Bir şey dəqiqdi ki, Ardanın Madriddəki gələcəyi artıq Karlo Ançelottinin klubda qalıb-qalmamasından asılı olacaq. İtaliyalı mütəxəssis ''Real''da qalacağı təqdirdə böyük ehtimalla Ardanı gələn mövsüm başqa klubda izləyəcəyik.

20 yaşlı futbolçu bu mövsüm 33 rəsmi oyunda 1170 dəqiqə meydanda olub və aktivinə 3 qol, 7 məhsuldar ötürmə yazıb.