İker Kasilyas ziyana düşüb. Onun evi qarət olunub.

"Football-plus.az" xəbər verir ki, bu barədə “Fuentes Informadas” nəşri məlumat yayıb.

İspaniyanın hüquq-mühafizə orqanları “Real”ın və ölkə yığmasının sabiq qapıçısının evindən bahalı saatlar oğurlamaqda şübhəli bilinən ailə cütlüyünü həbs edib. Məlumata görə, saxlanılan qadın bir neçə il ərzində Kasilyasın evində xidmətçi, onun həyat yoldaşı isə mühafizəçi işləyib. Cütlük əvvəlcədən plan quraraq sabiq futbolçunun kolleksiyasındakı beş ədəd “Rolex” markalı, hər biri təxminən 50 min avro dəyərində olan saatı oğurlayıb. Oğrular saatların yerinə keyfiyyətli saxta nüsxələr qoyaraq bəd əməllərini gizlətməyə çalışıblar. Daha sonra orijinal saatlar bütöv şəkildə deyil, hissələrə ayrılaraq satılıb ki, bu da onların axtarışını çətinləşdirib.

İker peşəkar futbolçu karyerasını 2020-ci ildə başa vurub. “Real”ın yetirməsi olan qapıçı bu komandanın formasını 25 il ərzində geyib. Karyerasının son 5 ilini isə “Portu”da keçirib. Kasilyasın İspaniya yığması ilə Avropa və dünya çempionu olduğunu da xatırladaq.