"Neftçi" Bizon ölkə kubokunun 2-ci təsnifat mərhələsində MOİK-i 6:2 hesabı ilə məğlub edərək 1/8 finala yüksəlib.

"Football-plus.az" xəbər verir ki, "ağ-qaralar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:

- Vensan Abubakarın 2-ci qolundan sonra nə söhbət edirdiz?
- Müzakirə edirdik. Onun toxunuşu, klası... Vurulan qola sevinirdik. Bu haqda danışırdıq, başqa bir şey yox idi.

- Özünüzə sual verirsiz ki, Abubakarı niyə vaxtında gətirmədik?
- Vaxtında gətirə bilməzdik. Bizim üçün əlçatmaz idi. Belə futbolçular üçün Azərbaycan premyer-liqası can atdıqları yer deyil. Uyğun zaman lazımdı ki, belə oyunçuları yaxalayasan. Mən sırf adın üstündə dayanmağın əleyhinəyəm. Bizim üçün də xoş hal deyil. Bütün futbolçular oynayır. Şəxsən mən bölgü aparmazdım. Digər futbolçuların etdiklərini də görürəm. Bizə hücumçu, bitirici lazım idi. Belə hücumçu gətirmişik. Biz sırf Abubakarın dalıyca qaçmamışdıq. Ad axtarmamışıq. Cərimə meydançasının içində bir toxunuşu ilə səviyyəsini göstərən hücumçu axtarmışıq. Həmin ərəfədə yetərincə adlar da var idi. Bizim üçün ən idealını seçmişik və gətirmişik.

- Püşkə baxanda kuboku qazanmaq şansınızı necə dəyərləndirirsiniz?
- Bizim üçün kubok həmişə çətin olub. Şəxsən mənim özüm üçün də. Elə komandayıq ki, bizim üçün növbəti oyun prioritetdi. Hər iki turnirdən də yapışacağıq. Baxmayaraq ki, bu, çətindi. Bizim üçün püşk önəmli deyil. Hər oyunu udmalıyıq. iki ay sonra kiminlə oynayacağımızı düşünmürük. Bu klubda belə şey olmayıb. "Sumqayıt"da işləyəndə fikirləşirdik ki, bu turnir asandı, bütün fikrimizi bura yönəldək. "Sumqayıt" "Qarabağ" deyil. Hər oyunun vacibliyini anlayırıq, təzyiqi hiss edirik.

- Abubakarın gəlişindən Bassala Sambunun psixoloji durumu necədi?
- Çoxa əladı. Yaxşı tərəfi odu ki, Sambu Abubakarla rəqabət aparacaq.

- Əlinizdə olan heyət hansı sistemlə oynamağa imkan verir?
- Murad Məmmədov zədələndiyi üçün məcburiyyətdən Mustafa Seki oynatdıq. Format məsələsinə gəldikdə, üçlü də, dördlü də ola bilər. Üstündə durduğumuz dördlü müdafiə sistemidi. Dəyişikliklərə də gedə bilərik. Məşqlərdə bəzi oyunçuları sol cinah müdafiəçisi mövqeyində yoxlayırıq.

- MOİK-dən 2 qol buraxdız. Belə demək olar ki, müdafiə və qapı xəttinə transfer lazım idi?
- Bu oyun "Neftçi" üçün göstərici deyil. Belə matçlara oyunçuları motivasiya etmək çətindi. Bu cür oyunlarda ancaq hücumu fikirləşirsən. Qapına hücum olanda belə zədəsiz vəziyyətdən çıxmaq istəyirsən. Futbolçuları anlayıram. Səhvlər var idi. Yüz faiz bilirəm ki, həmin futbolçular başqa oyunlarda o səhvləri etməz. Boşluqdan irəli gələn bir şeydi. Çox gözəl skaut departamentimiz var. Bir çox ölkələrə gedirlər. Transfer fəaliyyətini uzunmüddətli iş üzərində qururuq.

- Rza Cəfərovla klub arasında münasibətlər korlanıb?
- Rza ilə münasibət niyə pozulsun ki? Qəbələdə bu suala cavab verdim. Qapı xəttində yaxşı rəqabət var.