İvan Qaşek gözlənilən aqibətlə üzləşib. O, Çexiya yığmasının baş məşqçi vəzifəsindən istefaya göndərilib.

Çexiya Futbol Federasiyasının məlumatına görə, mütəxəssis ilə əməkdaşlığa vaxtından əvvəl xitam verilib. Onun köməkçisi Yaroslav Veseliy də komandanı tərk edib. Qaşek milli komandaya 2024-cü ilin yanvarında təyin olunub. Çexiya onun rəhbərliyi altında 21 oyunda meydana çıxıb, 11 qələbə qazanıb, 5 dəfə heç-heçə edib və 5 dəfə uduzub.

Çexiya bu ay DÇ-2026-nın seçmə mərhələsində Xorvatiya ilə qolsuz heç-heçə edib, Farer adalarına 1:2 hesabı ilə məğlub olub. Hazırda Çexiya yığması 13 xalla L qrupunda 2-ci yeri tutur.