Misli premyer-liqasının 8-ci turunun açılış oyununda “Kəpəz” “Şamaxı”nı səfərdə darmadağın etdi – 4:1.

Oyunsonrası mətbuat konfransında Gəncə təmsilçisinin baş məşqçisi Azər Bağırov jurnalistlərin suallarını cavablayıb.

- Bu qələbəni azarkeşlərimizə, xüsusilə azyaşlı azarkeşimiz Babəkə həsr edirik. Çətin oyun olacağını bilirdik. Stressdən, gərginlikdən çıxmaq üçün yol axtarırdıq. İnanıram ki, bu qələbə açar olacaq. Yaxşı komandaya qarşı oynadıq. "Şamaxı" necə oynamaq lazım olduğunu bilir. Rəqibi təhlil etmişdik. Şükürlər olsun ki, bu gün qələbə qazandıq.

- Babək kimdi?
- Gəncədən gələndə məni inandırdı ki, qələbə qazanacağıq. Onun sözləri mənim üçün xüsusi motivasiya idi. Buna görə onun adını çəkdim.

- Sanki Ayxan Abbasovla aranızda soyuqluq var. Nə baş verib?
- Heç bir soyuqluq yoxdu. Oyundan əvvəl bir yerdəydik, xeyli söhbət etdik. Ayxanla çox yaxşı münasibətimiz var. Biz çox yaxın qardaşıq, bir-birimizin xətrini çox istəyirik. Ayxan Abbasovun köməkçisi Elnur Çodarov da mənim uşaqlıq dostumdu.

- "Kəpəz"in artıq özünə gəldiyini demək olar?
- İşimiz çoxdu. Paltardəyişmə otağında vurğuladım ki, hələ heç nə etməmişik. Daha güclü olmalıyıq.

- Ötənilki komanda ilə indikini necə müqayisə edərdiz?
- Müqayisə etmək istəmirəm. O həyətdə də yaxşı futbolçular var idi, bu gün də var. Yolumuza davam edirik. Bu futbolçular bizə xallar qazandıracaq. Onları inandırmaq lazımdı. İnam ən güclü silahdı.

MÜZƏFFƏR QULUZADƏ