“Millinin çıxış etdiyi B qrupunda zəif rəqib yoxdu. Bu komandaların futbol səviyyəsi Azərbaycandan bir neçə addım öndədi. Bəli, yığmanın oyununda çatışmazlıqlar var. Amma mənim bu haqda danışmağım düzgün olmaz. Yanlış anlayarlar. Hər halda, yığmanın sabiq baş məşqçisiyəm. Məhz komandayla bağlı onu deyə bilərəm ki, futbolçuların əksəriyyəti premyer-liqa oyunlarında şans qazanmır. 4-5 oyunçuyla isə nəsə etmək mümkün deyil. Futbol kollektiv oyunudu. Habelə uğursuz nəticələrdə legioner limitinin ləğv edilməsinin də payı var. Çünki bu gün həmin futbolçuların çoxu meydana çıxa bilmir. Çıxsa da, forma geymək şansı az olur. Bəziləri də 1-ci liqada, əvəzedicilər liqasında çıxış edir. Bu oyunçularla, təbii ki, qrupdakı rəqiblərə müqavimət göstərmək çox çətindi. Bu üzdən, evdə qazanılan xalları yaxşı nəticə sayıram”.

“O, vəzifəyə hələ yeni təyin olunub. Təbii ki, təcrübə toplaması üçün zaman lazımdı. Üzərində işləyən mütəxəssislərdən biridi. Komandanı, demək olar ki, 10 gündü tanıyır. Özü də məşqçi karyerasında ilk addımlarını atır. Etiraf edək ki, Rəşad Eyyubov U-21-in baş məşqçisi olacaq qədər təcrübəyə malik deyil. Ancaq bu gün daha təcrübəli baş məşqçi gəlsə də, Portuqaliyadan, Çexiyadan xal ala bilməyəcəyik. Çünki problem təkcə məşqçiylə bağlı deyil. Sadəcə, gənc və yerli futbolçuların sayı çox azdı. Onlar da yetərincə şans qazanmır. Belədə bu cür nəticələr, daha doğrusu, böyükhesablı məğlubiyyətlər qaçılmaz olur. Odu ki, bu məsələləri məhz Rəşad Eyyubovla əlaqələndirmək doğru olmaz. Onun gələcəkdə böyük məşqçilərdən olacağını düşünürəm”.