“Bu barədə mən nəsə deyə bilmərəm. Məşqçi özü meydanda oyunçuların səviyyəsini görür. Düzdü, italiyalı çalışdırıcının birdən-birə belə danışması düzgün deyil. Hər kəs Canni de Byazini günahkar görür. Ancaq mən belə başa düşürəm ki, hər şey məşqçinin üstünə atılmamalıdı. Alınan hər bir məğlubiyyət komandada olan hər kəsə aiddi. De Byazi belə danışırsa, deməli, nəsə bilir. Bəlkə də onun dediklərində həqiqət var. Bunu pisə yozmaq olmaz. Oturub onun dediklərini təhlil etməli, fikirləşməliyik. Heç bir məşqçi istəməz ki, getdiyi yerdə uğursuz olsun. İlk növbədə öz adı üçün uğur qazanmaq niyyətində olar. De Byazi Albaniya yığmasındakı böyük nəticəni burda da göstərmək istəyib. Buna milyon faiz əminəm. Bəli, razıyam, Albaniyanın o heyəti ilə bizim yığmanın indiki heyəti arasında fərq çoxdu. Onların oyunçuları yaxşı çempionatlarda çıxış edirdi. Amma 2016-cı ildə Avropa çempionatında qazanılan uğurda tək futbolçuların yox, De Byazinin də əməyi var idi. İndi heç nə alınmadısa, baş məşqçi də milli və oyunçular haqda belə fikirlər səsləndirirsə, bu, düzgün deyil. Artıq bunu baş məşqçinin vicdanına buraxıram. İlk gündən bu sözləri desəydi, mən buna nəsə deməzdim. Futbolçularımızın hazırkı səviyyəsi göz önündədi. Vallah, yığmanın heyətində çıxış edən bəzi oyunçulardan çox narazıyam. Həddən artıq aşağı səviyyədə oynayırlar. Düzdü, premyer-liqa ilə millidəki oyunlar arasında çox fərq var. Məsələn, ölkə çempionatında buraxdığın səhvlərə görə rəqib cəzalandırmaya bilər, lakin yığmada belə deyil, səhvlərin cəzasını çəkirsən. Çünki burda daha üst səviyyəli futbolçulara qarşı oynayırsan. Mən indi yığmanın oyunlarına baxıram və görürəm ki, “Qarabağ”ın heyətində olan oyunçular millidə özünü göstərə bilmir. Mənə də maraqlıdı ki, bunun səbəbi nədi? Bəlkə də məşqçi ilə aralarında problem var, bəlkə də taktikaya uyğun gəlmirlər. Amma bunu dəqiq deyə bilmərəm. İndi De Byazinin fikirlərini, yenə də deyirəm ki, pisə yozmayaq. Bəlkə də futbolumuzda nəsə düz getmir. Baxın legioner həyatı yaşayan oyunçularımıza. Yüksək səviyyəli çempionatlarda çıxış etmirlər, oynadıqları klublarda çox şans qazana bilmirlər. Bu amillər də var. Demirəm ki, gələcəkdə Azərbaycandan futbolçu çıxmayacaq. Olacağına inanıram. Amma indi reallığa da baxmaq lazımdı. Hazırda balaca uşaqlar çalışır. Onlardan birdən-birə böyük şey gözləmək də olmaz. Mən də istəyirəm ki, Azərbaycan futbolunun gələcəyi parlaq olsun. Bütün futbolçularımıza uğurlar arzulayıram. Baş məşqçinin də fikirlərinə çox qarışa bilmərəm. Ola bilər ki, onun verdiyi taktikanı futbolçularımız meydanda göstərə bilmir”.

“Mən bu oyundan qələbə gözləyirəm. Ancaq birinci görüşdəki kimi oynasaq, çətin ki, nəsə əldə edək. Udulmalı rəqibdi. Məğlub olsaq, bizim milli üçün bir siqnal olacaq. Çünki uduzacağımız halda, ölkə futboluna daha ciddi yanaşmaq lazım olacağını düşünürəm”.